Regbi bo'yicha O'zbekiston chempionati start oldi

Maydonda huquqni muhofaza qiluvchi organlar va universitet talabalaridan tashkil topgan 11ta erkaklar va 6ta ayollar jamoasi kuch sinashyapti.

Dastlab musobaqaning tantanali ochilish marosimi o'tkazildi. Unda O'zbekiston Milliy olimpiya qo'mitasi prezidenti R.SHoabdurahmonov, qo'mita bosh kotibi O.Kasimov, Jismoniy tarbiya va sport vazirining birinchi o'rinbosari R.Irmatov, Respublika regbi federaciyasi rahbariyati, tegishli masul tashkilotlar vakillari ishtirok etib, musobaqa qatnashchilariga omad tilashdi.

– Davlatimiz rahbari tomonidan jismoniy tarbiya va sportni aholi o'rtasida rivojlantirishga katta etibor qaratilyapti. Kuni kecha qabul qilingan «Sog'lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to'g'risida»gi farmoni bu boradagi ulkan qadam bo'ldi. Endi mehnat jamoalari ham katta sportga kirib kelishi uchun bir turtki vazifasini o'taydi. Endi nafaqat ishchi-xodimlarni, balki rahbarlarni ham sport maydonlarida ko'ramiz. Respublika tovar xom ashyo birjasi bu borada o'rnak bo'lib, o'z jamoasini shakllantirganiga guvohi bo'ldik. Pandemiyadan keyin asta-sekinlik bilan musobaqalar start olyapti. O'ylaymanki, endilikda barcha etibor regbini rivojlantirish, yangi jamoalarni shakllantirish, shu orqali yoshlar o'rtasida sog'lom turmush tarzini qaror toptirishga qaratiladi, – dedi qo'mita Bosh kotibi O.Kasimov.

– Regbi jismoniy baquvvat bo'lgan yigit-qizlar shug'ullanadigan sport turi. Nafaqat poytaxtimizda, balki viloyatlarda ham jamoalar shakllanib kelyapti. Milliy olimpiya qo'mitasi va mamlakat regbi federaciyasi bilan birgalikda vazirligimiz tomonidan regbini yoshlar o'rtasida ham keng rivojlantirish maqsadida chora-tadbirlar rejasi ishlab chiqqanmiz. O'ylaymanki, ushbu tur mamlakatimizda eng sevib o'ynaladigan jamoaviy o'yinlardan biriga aylanadi, – deydi O'zbekiston Respublikasi Jismoniy tarbiya va sport vazirining birinchi o'rinbosari Ravshan Irmatov.

Bu yildan ushbu sport turi infratuzilmasini yaxshilash, etarli shart-sharoitlar yaratish bo'yicha ko'plab amaliy ishlar qilinyapti. Ayni paytda mavjud stadionlar regbi bilan shug'ullanish uchun talabga javob bermaydi, mutaxassislarga ham ehtiyoj bor. SHu sababdan, “Yo'l xaritasi” ishlab chiqildi va inshootlarni jahon andozalari asosida tamirlash masalalari davlat dasturiga kiritilyapti.

Malumot o'rnida aytish lozimki, ushbu tur ikki yo'nalish – regbi-15 va regbi-7dan iborat. Regbi-7 bo'yicha mamlakat chempionati 4 turdan iborat bo'lib, yakunda g'olib nomi aniqlanishi lozim edi. Pandemiya munosabati bilan musobaqalar jadvaliga o'zgartirish kiritilib, turlar soni qisqartirildi. SHu sababdan 13-15 noyabr kunlari Farg'ona shahrida 2-tur bahslari bilan chempionat yakunlanadi.

Ertaga yarim final va final bahslari o'tkaziladi. Dekabr oyida esa regbi-15 bo'yicha O'zbekiston chempionatiga start beriladi.