Rojer Federer sentyabrda Toshkentga kelmaydi

Malumki, shu yilning 16-18 sentyabr kunlari Toshkentda tennis bo'yicha norasmiy jahon chempionati xisoblangan Devis Kubogining Jahon ligasiga chiqish uchun uchrashuv bo'lib o'tadi. Unda O'zbekiston va SHveycariya terma jamoalari o'zaro to'qnash kelishadi. G'olib jamoa jahon ligasi yo'llanmasini qo'lga kiritadi.

Ushbu uchrashuvda dunyoning uchinchi raketkasi Rojer Federer aniq ishtirok etmaydi. Kecha Federer bayonot berib, joriy yil hisobidan boshqa kortga chiqmasligini malum qildi. Rojer to'rt yillikning eng nufuzli musobaqasi Rio Olimpiadasida ham qatnashmaydi.

Katta ehtimol bilan dunyoning beshinchi raketkasi Sten Vavrinka ham SHveycariya terma jamoasi tarkibida Toshkentga kelmaydi. SHunda SHveycariya terma jamoasi tarkibida Marko Kyudinelli (125), Genri Laksonsen (162), Yann Marti (375), Adrien Bossel (476), Antoni Beler (534) kabi tennischilar qoladi. Aynan mana shu tennischilarning Toshkentdagi uchrashuvda SHveycariya sharafini himoya qilishi kutilmoqda.

Eslatib o'tamiz, O'zbekiston terma jamoasi bundan avvalgi bosqich saralash uchrashuvida Xitoy tennischilarini Toshkentda 3:2 hisobida mag'lubiyatga uchratib, pley-offda ishtirok etish huquqini qo'lga kiritgandi.

SHveycariyaliklar esa jahon ligasi birinchi bosqichida Italiyaga qarshi o'yin o'tkazib, 0:5 hisobida mag'lubiyatni qabul qilib olgandilar.