Ro'ziqul Berdiev: “Ochko yo'qotganimiz alamli bo'ldi”

Matbuot anjumanida mezbonlardan "Nasaf" ustozi Ro'ziqul Berdiev va uchrashuvning eng yaxshi o'yinchisi Azizjon G'anievlar ishtirok etishdi.

Ro'ziqul Berdiev: - Uchrashuvni nazoratimiz ostida o'tkazdik. Ammo himoyadagi bitta xato ochko yo'qotishimizga olib keldi. Tajribali himoyachilarimiz bunday qo'pol xatoga yo'l qo'ymasliklari kerak edi. Albatta, futbolchilarimizga etirozim yo'q. Ammo ochko yo'qotganimiz alamli bo'ldi. Umuman olganda yigitlarimiz yomon o'ynashmadi. Endi oldimizda turgan muhim o'yinga tayyorgarlikni boshlaymiz.

Azizjon G'aniev: - Biz bu o'yinga astoydil tayyorgarlik ko'rgan edik. Bunday natijaga loyiq o'yin ko'rsatmadik deb, hisoblayman. Ammo afsuski tayyor g'alabani qo'ldan chiqardik. SHunisi alamli bo'ldi.

Ro'ziqul Berdiev: - CHeran hali o'yinga to'liq tayyor emasligi uchun bugun uni maydonga tushirmadik. U faqat kecha safimizga qo'shildi. Bu o'yinchimiz bizga juda kerak bo'layapti. O'ylaymanki, u navbatdagi o'yinimizda bizga yordam bera oladi. Albatta “Persepolis” bilan bo'ladigan o'yin haqida o'ylamasligimizni iloji yo'q. Ammo bugungi tanlangan tarkib yoki olib borilgan o'yin, navbatdagi o'yinni o'ylab qilingan emas. Barcha o'yinlar biz uchun muhim. 

Bobir Abduxoliqovni dastlabki daqiqalardan maydonga tushirmaganimizga sabab, bu futbolchimiz keyingi vaqtda umuman dam olmasdan maydonga tushmoqda. SHuningdek boshqa o'yinchilarimizda ham shu holat, hohlaymizmi yo'qmi bunday ketma-ket o'yinlar bari bir futbolchilarni toliqtirib qo'yadi. Ammo biz keyingi o'yinga yaxshi tayyorlanamiz, muxlislarimiz bizdan ijobiy natija kutishayapti. Biz ularni xursand qilish uchun maydonga tushamiz.