Saint Louis Rapid & Blitz. Abdusattorov birinchi kun uch amerikalik grossmeyster bilan o'ynadi

Bu hisob bo'yicha GCT turkumidagi to'rtinchi musobaqa bo'lib, dunyoning ko'zga ko'ringan yulduzlari bosh sovrin uchun o'zaro bahslarga kirishishdi. 15 avgustga qadar davom etadigan turnirda hamyurtimiz Nodirbek Abdusattorov yurtimiz sharafini himoya qiladi. 

Musobaqa formatiga ko'ra, o'yinlar 3 kun rapid (25+10) va 2 kun blic (5+2) yo'nalishida o'tkaziladi. Rapidda g'alaba uchun 2, blicda esa 1 ochko beriladi. Rapid turniri 9 tur, blic musobaqasi esa aylana tizimda 18 turdan iborat bo'ladi. 

Saint Louis Rapid & Blitz turniri ishtirokchilari: Nodirbek Abdusattorov, Fabiano Karuana (AQSH), Gukesh Dommaradju (Hindiston), Maksim Vashe-Lagrav (Franciya), Uesli So (AQSH), Le Kuang Lem (Vetnam), Lener Domingez (AQSH), Levon Aronyan (AQSH), Sem SHankland (AQSH), Grigoriy Oparin (AQSH)

Musobaqaning birinchi kuni rapid yo'nalishida 3 ta tur uchrashuvlari o'tkazildi. Nodirbek uchchala partiyada ham amerikalik grossmeysterlarga qarshi bahs olib bordi. Birinchi turda qora donalarda Uesli So bilan durangga imzo chekdi. Ikkinchi turda Fabiano Karuanaga imkoniyatni boy berdi. Uchinchi turda esa yutuqli partiyada qo'pol xatoga yo'l qo'yishi natijasida Levon Aronyanga alamli tarzda yutqazib qo'ydi. 

Bugun Abdusattorov 4-turda yana AQSH vakili Grigoriy Oparinga qarshi oq donalarda o'ynaydi. Beshinchi turda qora donalarda vetnamlik grossmeyster Le Kuang Lem, 6-turda oq donalarda amaldagi jahon chempioni, hindistonlik azaliy raqibi Gukesh Dommaradju bilan hisob-kitob qiladi. Bugun ham rapid bahslarida 3 ta tur o'tkaziladi.