Saint Louis Rapid & Blitz. Abdusattorov blic bahslarini yaxshi boshladi, amaldagi jahon chempioni mag'lub etildi

Bu hisob bo'yicha GCT turkumidagi to'rtinchi musobaqa bo'lib, dunyoning ko'zga ko'ringan yulduzlari bosh sovrin uchun o'zaro bahs olib bormoqda. Turnirda Nodirbek Abdusattorov yurtimiz sharafini himoya qilmoqda. 

Musobaqa formatiga ko'ra, o'yinlar 3 kun rapid (25+10) va 2 kun blic (5+2) yo'nalishida o'tkazilmoqda. Rapidda g'alaba uchun 2, blicda esa 1 ochko beriladi. Rapid turniri 9 tur, blic musobaqasi esa aylana tizimda 18 turdan iborat bo'ladi. 

Saint Louis Rapid & Blitz turniri ishtirokchilari: Nodirbek Abdusattorov, Fabiano Karuana (AQSH), Gukesh Dommaradju (Hindiston), Maksim Vashe-Lagrav (Franciya), Uesli So (AQSH), Le Kuang Lem (Vetnam), Lener Domingez (AQSH), Levon Aronyan (AQSH), Sem SHankland (AQSH), Grigoriy Oparin (AQSH)

Musobaqaning to'rtinchi kuni blic, yani tezkor shaxmat yo'nalishida dastlabki 9 ta tur uchrashuvi o'tkazildi. Bundan avvalgi Rapid & Blitz turnirida bo'lgani singari Nodirbek aynan blic bahslarini juda yaxshi boshladi. Abdusattorov amaldagi jahon chempioni Gukesh Dommaradju, turnir etakchilaridan Fabiano Karuana, Levon Aronyan, Lener Dominges, Sem SHanklandni mag'lubiyatga uchratdi. Maksim Vashe-Lagrav, Le Kuang Lem bilan durang o'ynadi. G'alabali poziciyalarda Uesli So va Grigoriy Oparinga imkoniyatni boy berib qo'ydi. 

Blic musobaqasining ilk kuni Levon Aronyan, Uesli So, Nodirbek Abdusattorov, Le Kuang Lem va Grigoriy Oparin bir xilda 6 ochkodan jamg'arishdi. Blic baxslarining turnir jadvalida Arnoyan qo'shimcha ko'rsatkichlarga ko'ra peshqadamlik qilyapti. Uesli So ikkinchi, Nodirbek esa uchinchi o'rinni band etgan.

Rapid va blic bahslarining umumiy jadvalida esa Abdusattorov Uesli So bilan birga 4-o'rindan joy olgan. Har ikki shaxmatchi 15 ochkodan jamg'argan. Levon Aronyan 19 ochko bilan yakka karvonboshi bo'lib turibdi. Bugun blic bahslarida yana 9 ta tur o'ynaladi.