Saint Louis Rapid & Blitz. Abdusattorov ikkinchi kun bahslarini yaxshi o'tkazdi

Bu hisob bo'yicha GCT turkumidagi to'rtinchi musobaqa bo'lib, dunyoning ko'zga ko'ringan yulduzlari bosh sovrin uchun o'zaro bahslarga kirishgan. 15 avgustga qadar davom etadigan turnirda hamyurtimiz Nodirbek Abdusattorov yurtimiz sharafini himoya qilmoqda. 

Musobaqa formatiga ko'ra, o'yinlar 3 kun rapid (25+10) va 2 kun blic (5+2) yo'nalishida o'tkaziladi. Rapidda g'alaba uchun 2, blicda esa 1 ochko beriladi. Rapid turniri 9 tur, blic musobaqasi esa aylana tizimda 18 turdan iborat bo'ladi. 

Saint Louis Rapid & Blitz turniri ishtirokchilari: Nodirbek Abdusattorov, Fabiano Karuana (AQSH), Gukesh Dommaradju (Hindiston), Maksim Vashe-Lagrav (Franciya), Uesli So (AQSH), Le Kuang Lem (Vetnam), Lener Domingez (AQSH), Levon Aronyan (AQSH), Sem SHankland (AQSH), Grigoriy Oparin (AQSH)

Musobaqaning birinchi kuni rapid yo'nalishida 3 ta tur uchrashuvi o'tkazilib, unda Nodirbek 1 durang, 2 mag'lubiyat qayd etgandi. Abdusattorov ikkinchi kun o'tkazilgan 3 ta uchrashuvning bittasida g'alaba qozonib, 2 tasida raqiblari bilan durangga imzo chekdi. U 4-turda AQSH vakili Grigoriy Oparinni mag'lubiyatga uchratdi. Beshinchi turda qora donalarda vetnamlik grossmeyster Le Kuang Lem, 6-turda esa oq donalarda amaldagi jahon chempioni, hindistonlik azaliy raqibi Gukesh Dommaradju bilan murosaga keldi. 

Bugun rapid bahslarining uchinchi kuni yana 3 ta tur uchrashuvi o'tkaziladi. Abdusattorov 7-turda qora donalarda franciyalik Maksim Vashe-Lagrva, 8-turda ham qora donalarda amerikalik Sem SHankland, 9-turda esa oq donalarda yana bir AQSH vakili Lener Domingesga qarshi bahs olib boradi. Hozircha hamyurtimiz 5 ochko bilan 10 ishtirokchi orasida 7-o'rinni egallab turibdi.