Saint Louis Rapid & Blitz. Nodirbek Abdusattorov rapid bahslaridagi ishtirokini yakunladi

Saint Louis Rapid & Blitz musobaqasi "Grand Chess Tour" loyihasi doirasidagi to'rtinchi turnir bo'lib, uning mukofot jamg'armasi 175 000 AQSH dollarini tashkil qiladi. Bosh sovrin uchun birinchi raqamli shaxmatchimiz Nodirbek Abdusattorov ham kurash olib boryapti. 

Turnir aylanma formatda, rapid va blic yo'nalishlarida vaqt nazoratida o'tkazilyapti. Grossmeysterlar 9 tur rapid, 18 tur blic yo'nalishida o'zaro dona surishadi. Musobaqaning dastlabki uch kuni rapid bahslari o'tkazildi. Qolgan ikki kun esa endi blic turniri tashkil etiladi. Rapid qismidagi g'alabaga 2, durangga 1 ochko berildi. 

Turnir ishtirokchilari: Nodirbek Abdusattorov (O'zbekiston), Levon Aronyan, Fabiano Karuana, Hikaru Nakamura, Lener Dominges, Uesli So (hammasi AQSH), Maksim Vashe-Lagrav, Alirizo Firuzja (ikkisi Franciya), Yan Nepomnyashiy (FIDE), Rameshbabu Pragnanandha (Hindiston)

Musobaqaning uchinchi kuni ham shaxmatchilar 3 ta turda to'qnash kelishdi. Nodirbek Abdusattorov kecha 1 g'alaba, 1 durang va bir mag'lubiyat qayd etdi. Hamyurtimiz asli armanistonlik, bir necha yildan beri AQSH sharafini himoya qilayotgan Levon Aronyanni mag'lubiyatga uchratdi. FIDE bayrog'i ostida harakat qilayotgan rossiyalik Yan Nepomnyashiy bilan murosaga keldi. Amerikalik Uesli Soga esa imkoniyatni boy berib qo'ydi. 

SHu tariqa, Nodirbek Abdusattorov 8 ochko bilan qo'shimcha ko'rsatkichlarga ko'ra rapid bahslarini 9-o'rinda yakunladi. Hindistonlik Rameshbabu Pragnanandha 4 ochko bilan so'nggi pog'onadan joy oldi. Yan Nepomnyashiy 11 ochko bilan qo'shimcha koeficentlarga ko'ra 1-o'rinni egalladi. Kuchli uchlikni yakunlab bergan franciyalik grossmeysterlar Alireza Firuzja va Maksim Vashe-Lagrav ham 11 ochkodan jamg'arishdi.   

Bugun Saint Louis Rapid & Blitz musobaqasining blic bahslariga start beriladi. Ilk tur uchrashuvlari bizning vaqt bilan soat 23:00da boshlanadi.