Saint Louis Rapid & Blitz turniri yakunlandi. Abdusattorov blicda birinchi bo'ldi

Bu hisob bo'yicha GCT turkumidagi to'rtinchi musobaqa bo'lib, dunyoning ko'zga ko'ringan yulduzlari bosh sovrin uchun o'zaro bahs olib borishdi. Turnirda grossmeysterimiz, rapid yo'nalishida jahon chempioni Nodirbek Abdusattorov yurtimiz sharafini himoya qildi. 

Musobaqa formatiga ko'ra, o'yinlar 3 kun rapid (25+10) va 2 kun blic (5+2) yo'nalishida o'tkazildi. Rapidda g'alaba uchun 2, blicda esa 1 ochko berildi. Rapid turniri 9 tur, blic musobaqasi esa aylana tizimda 18 turdan iborat bo'ldi. 

Saint Louis Rapid & Blitz turniri ishtirokchilari: Nodirbek Abdusattorov, Fabiano Karuana (AQSH), Gukesh Dommaradju (Hindiston), Maksim Vashe-Lagrav (Franciya), Uesli So (AQSH), Le Kuang Lem (Vetnam), Lener Domingez (AQSH), Levon Aronyan (AQSH), Sem SHankland (AQSH), Grigoriy Oparin (AQSH)

Musobaqaning beshinchi kuni blic, yani tezkor shaxmat yo'nalishida yana 9 ta tur uchrashuvi o'tkazildi. Abdusattorov kechagi kun startida ketma-ket ikkita g'alabaga erishdi. Maksim Vashe-Lagrav va Grigoriy Oparin taslim etildi. Uchinchi turda Nodirbek "ushlaganni yurish" qoidasi sabab bitta piyodasini yo'qotgan bo'lishiga qaramay, yakunda peshqadam Levon Aronyan bilan durang qayd eta oldi.    

To'rtinchi partiyada amaldagi jahon chempioni Gukesh Dommaradjuga qarshi bahsda katta ustunlikka ega bo'lsa-da, vaqt kamligi tufayli alamli mag'lubiyatni qabul qilib oldi. Blicning birinchi kuni Abdusattorov Gukeshni mag'lub etgandi. Keyin hamyurtimiz Uesli So, Sem SHankland va Lener Dominges bilan durangga imzo chekdi. Reyting etakchisi Fabiano Karuanani ikkinchi marotaba ham taslim etdi. So'nggi turda vetnamlik grossmeyster Le Kuang Lem bilan durang o'ynadi. 

Bor yo'g'i yarim ochko uni sovrinli uchlikdan ajratib qoldi. Bir ochko ko'proq jamg'arganida esa musobaqada ikkinchi o'rinni egallardi. SHunga qaramay, Nodirbek blic turnirida 18 turdan 11,5 ochko jamg'arib, 1-o'rinni egalladi. Abdusattorov rapid yo'nalishida 7-o'rin bilan cheklangandi. Aynan o'sha rapidda yo'qotilgan qimmatli ochkolar hamyurtimizni yakunda umumiy ro'yxatda 4-o'rinni egallashini "taminladi". 

Asli armanistonlik, bir necha yildan beri AQSH sharafini himoya qilayotgan Levon Aronyan — Saint Louis rapid and blitz 2025 turniri chempioniga aylandi. Aronyan turnir yakunlanishiga 3 tur qolganida chempionlikni amalda rasmiylashtirdi. Fabiano Karuana rapidda 1-o'rinni egallaganiga qaramay, blic bahslarida 18 turdan 7,5 ochko to'plab (blicda 8-o'rin), umumiy jadvalda 2-o'rinni band etdi. Nodirbekni 0,5 ochkoga ortda qoldirgan franciyalik Maksim Vashe-Lagrav musobaqani kuchli uchlikda yakunladi.