"Salom Hindiston!". Olimpiada mezbonligi uchun O'zbekistonda katta tayyorgarlik yoxud Olamsport.com CHennayda!

O'zbekiston terma jamoasi yigitlari musobaqada muvaffaqiyatli yurishni davom ettirishmoqda va hozircha kuchli uchlikda bo'lib turishibdi. 

Yaxshi bilasiz, mazkur musobaqa davomida 2026 yilgi Butunjahon shaxmat Olimpiadasi mezboni ham aniqlanadi va unda O'zbekiston musobaqani tashkil etish uchun davogar hisoblanadi. 

SHu munosabat bilan O'zbekiston shaxmat federaciyasi va Yoshlar ishlari agentligi Hindistondagi Olimpiadaga katta tayyorgarlik bilan keldi. Yuqoridagi tashkilotlar tashabbusi bilan yurtimizdan bir necha ommaviy axborot vositalari xodimlari, shu jumladan men Olamsport.com sayti xodimi sifatida CHennaydagi musobaqa tafsilotlarini bevosita musobaqa joyidan yoritib borishga harakat qilamiz. 

Kecha, 2 avgust kuni Toshkent - Dehli - CHennay yo'nalishida musobaqa joyiga etib keldik. CHennay aeroportida shaxmat Olimpiadasining tashkiliy qo'mitasi azolari delegaciyamiz azolarini kutib olishdi va o'zimiz uchun ajratilgan mehmonxonalarga yo'l oldik. 

Kechga tomon O'zbekiston shaxmat federaciyasi raisi o'rinbosari Husan Turdaliev Xalqaro shaxmat federaciyasi tadbirlarida ishtirok etuvchi delegatlar istiqomat qilayotgan mehmonxonada jarayon bilan tanishtirdi. Yuqorida aytilganidek, mezbonlik uchun kurashayotgan O'zbekiston bu erga katta tayyorgarlik bilan kelgan va buni kecha o'z ko'zimiz bilan ko'rib, guvoh bo'ldik. U erda mamlakatimiz haqida malumot beruvchi maxsus pavilon qurilgan va mehmonlar o'zlari uchun kerakli malumotlarni olish imkoniga ega bo'ladilar.  Darvoqe, biz bilan birga taniqli oshpaz Bahriddin CHustiy ham kelgan va yaqin kunlarda u kishi tomonidan tayyorlangan palovni Hindistondagi shaxmat Olimpiadasi mehmonlari tatib ko'rishlari mumkin bo'ladi.

Birozdan so'ng Olimpiada o'tkazilayotgan, "Four Points by Sheraton" mehmonxonasiga yo'l olamiz. O'zimiz yashayotgan manzil va musobaqa joyi orasidagi masofa 80 kilometrni tashkil etar ekan. Musobaqa tashkilotchilari OAV xodimlari uchun maxsus transportlar tashkil etishgan. U erga borib shaxmatchilarimizning o'yinlarini kuzatish imkoniga ega bo'lamiz. Aytishlaricha, bahslar boshlanganidan so'ng faqatgina 20 daqiqa OAV xodimlariga ishlash uchun ruxsat etilar ekan. SHaxmatchilarni chalg'itmaslik maqsadida shunday qarorga kelingan.

Olamsport.com sayti o'z navbatida musobaqa tafsilotlarini imkon qadar batafsil yoritishga harakat qiladi. Bizni kuzatishda davom eting. 

Aziz To'xtamurodov, CHennay shahridan