Samarqand shahrida “Samarkand half marathon” xayriya tadbiri o'tkaziladi

Mazkur tadbirning ahamiyatli jihati shundaki, unda yurtimizda sayohat qilib yurgan turistlar va imkoniyati cheklanganlar, shuningdek, 20 ga yaqin davlatlardan kelgan ishtirokchilar ham qatnashadi. Hozirgacha bu xayriya tadbirida ishtirok etish uchun 3 mingga yaqin marafonchilar musobaqa badalini to'lagan. Tadbirdan tushgan xayriya mablag'iga ko'zi ojiz insonlar uchun tiflosharhlash (ko'zi ojizlar uchun malumotni qabul qilish imkonini beruvchi usul) yordamida spektakl sahnalashtiriladi.

Loyihaga binoan yarim marafonda ishtirokchilar 21, 10 va 2 km masofaga yuguradi. Bu masofalarga yugurish orqali ishtirokchilar Samarqand shahridagi 18 ta tarixiy obidani ko'radilar.

Belgilangan vaqtda marraga kelgan ishtirokchilarga shu joyning o'zida medal va esdalik sovg'alari topshiriladi hamda 1-3 o'rinlarni qo'lga kiritgan ishtirokchilar pul mukofotlariga ham ega bo'lishadi.

SHuningdek, 3 kunlik tadbir davomida tasviriy sanat asarlarining taktil (qo'l bilan ushlab his qilish mumkin bo'lgan) ko'rgazmasi tashkil qilinadi va “Beat films” kinofestivali bilan hamkorlikda hujjatli kinofilmlar namoyishi o'tkaziladi.