Samvel Babayan: “Geynrix hali qarib qolgani yo'q”

“Eng avvalo mana shunday qo'llab-quvvatlash uchun muxlislarga minnatdorchilik bildirmoqchiman. Yigitlar g'alaba qozonib, bayramni davom ettirish uchun qo'ldan kelgan barcha ishni qilishdi.

SHukr, ushbu bosqichni g'alaba bilan boshlab oldik. Haydarov va Ahmedovlarga kichik jarohatlari bo'lsada, mana shunday o'ynaganlari uchun rahmat aytmoqchiman. Suriya juda yaxshi jamoa. Bu haqida oldin ham aytib o'tgandim. Balki, mahorat bobida ular biroz tajribasizdirlar. Biroq, kurashish borasida ular juda yaxshi taassurot qoldirishdi.

Deyarli yarim yillik tanaffusdan so'ng rasmiy o'yin o'tkazdik. Nasib qilsa, keyingi o'yinlarga yanada yaxshiroq tayyorgarlik ko'ramiz.

Futbolda muhim narsa bor. O'yin formasi. Afsuski, bazi futbolchilarimiz hali to'liq formaga kirishib keta olmadilar. Umid qilamanki, ular keyingi o'yinga stabil holatda bo'ladilar.

Sardor ham hozircha optimal formada emas. U hozircha bu mavsumda bittagina o'yinda maydonga tushdi. U jamoasi bilan 65 kun tatilda bo'lgan. Bunaqasi futbolda kamdan-kam bo'ladi. Uni o'zgartirish rejamizda bor edi. U hozir kiyinish xonasida menga Qatarda bundan ham yaxshi o'yin ko'rsatishga vada berdi.

Jeparovning burchak zarbalari? Bugun bizning futbolda standart vaziyatlar ijrochisi deb kimni ko'rsatishimiz mumkin? Ular barmoq bilan sanarli darajada. Server ana shunday futbolchilardan biri.

Geynrix hali qarib qolgani yo'q. U zaxiradan tushib, o'yinni o'zgartirib yubora oladigan futbolchi. Uning pasportdagi yoshini menga ahamiyati yo'q. Muhimi, u terma jamoa uchun borini berishga tayyor.

Hozirdan boshlab Qatarga qarshi tayyorgarlik ko'rishni boshlaymiz. Ertaga tiklanish mashqlarini bajaramiz. Qatarga 4 sentyabr kuni jo'nab ketamiz. O'sha o'yinda bizga Krimec ham yordam berishi mumkin bo'ladi. Keyingi o'yin juda muhim hisoblanadi.

Biz oxirigacha kurasha olamiz", - deydi terma jamoamiz bosh murabbiyi Samvel Babayan.

Aziz To'xtamurodovyozib oldi