Sanjar Fayziev: “Hech qachon “post” qoldirmagandim, lekin bu safar majbur bo'ldim”

Kecha hal qiluvchi uchrashuvda Sanjar Fayziev Buyuk Britaniya terma jamoasining birinchi raketkasiga 2:6, 2:6, 0:6 hisobida yutqazib qo'ygandi. Aslida bu bahsda Kameronga qarshi Denis Istomin kortga chiqishi kerak edi. 

Lekin bizga malum bo'lmagan sabablarga ko'ra, Denisning o'rnini Sanjar egalladi. Fayzievga etirozimiz yo'q. Qo'lidan kelganicha harakat qildi. Ammo, tajriba bu safar o'z so'zini aytdi. Jo'rabek Karimov esa aynan yoshlik shijoati evaziga sensacion natija qayd etgandi. Kechagi uchrashuvdan so'ng Fayziev facebook ijtimoiy tarmog'idagi sahifasida fikr qoldirgan.

“SHu kungacha ijtimoiy tarmoqlarda munosabatga asoslangan fikr qoldirmagandim. Lekin bu safar “post” yozishga majbur bo'ldim. Sportga, xususan tennisga aloqador barcha insonlardan, terma jamoamizga befarq bo'lmagan muxlislardan KECHIRIM so'rayman. 

Afsuski, kutilgan o'yinni namoyish eta olmadim. To'g'ri, tennis bu shunchaki bir o'yin, lekin mamlakat terma jamoasi o'ynaganida, buning masuliyati umuman boshqacha bo'ladi. O'z o'yinim va qayd etgan natijam bilan qancha insonlarning kayfiyatini tushirib yubordim. Buni juda yaxshi bilaman.

Keyingi o'yinlarda vaziyatni ijobiy tomonga o'zgartirishga harakat qilaman. Aynan mening ishtirokimdagi oxirgi o'yinni inobatga olmaganda, jamoamiz g'alaba uchun borini berdi. Do'stim Jo'rabek Karimovni alohida takidlab o'tgan bo'lardim. Hayot davom etadi, kelasi yili jahon ligasiga chiqishga urinib ko'ramiz”, - dedi Fayziev.