Sergey Bogachuk: "Madrimov Krouford bilan jangda g'alaba qozongandi"

Ukrainalik jurnalist Bogachuk bilan kichik intervyu uyushtirdi.

— Raqibingiz haqida nima deya olasiz? U siz jang qilishni istaydigan bokschimi?

— Ayni damda Madrimovni mening vazn toifamdagi eng yaxshi bokschilardan biri deb hisoblayman, chunki u aslida Krouford bilan jangda g'alaba qozongan edi. Ammo g'alaba shunchaki unga berilmadi. Umuman olganda, u mening vazn toifamdagi eng yaxshilaridan biri.

— Madrimovning qanday yutuq va shu bilan birga kamchiliklari bor?

— Yutuqlari qatorida shuni alohida takidlash joizki, bu bokschining yaxshi zarbasi bor, uning tajribasini ham aytib o'tish joiz. Uning havaskor boksdagi ko'p yillik faoliyati eng katta yutug'i. Zaif tomoni shundaki, u bardoshli emas. Yani, jang boshida u yaxshi harakatlanadi, lekin keyin unga chidamlilik etishmaydi. Umuman olganda, Madrimov juda yaxshi bokschi.

Eslatib o'tamiz, Sergey Bogachuk va Isroil Madrimov o'rtasidagi jang 21 dekabr kuni Saudiya Arabistoni poytaxti Ar-Riyod shahrida o'tkaziladi.