Sharjah Masters 2025. 7-turda o'zbek derbisi, Nig'matovda g'alaba, Nodirbek peshqadam bilan o'ynadi

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda. 

Kecha musobaqada 7-tur uchrashuvlari bo'lib o'tdi. Musobaqada birinchi raqam ostida saralangan Nodirbek Abdusattorov birinchi doskada qora donalarda turnirning ikkinchi raqamli shaxmatchisi, niderlandiyadik Anish Giriga qarshi bahs olib bordi va durangga rozi bo'ldi. Hamyurtimiz turnir jadvalida 5 ochko bilan sof ikkinchi o'ringa ko'tarilib oldi. Giri 5,5 ochko bilan peshqadamlikni davom ettirmoqda.  

Sharjah Masters 2025 turnirining 7-turida o'zbek derbisi kuzatildi. Jahongir Vohidov va Muhiddin Madaminov o'zaro uchrashuvda 15-yurishdan so'ng durangga imzo chekishdi. Har ikki grossmeysterimizning ochkosi 2 taga etdi. Ortiq Nig'matov bu turda oq donalarda rossiyalik grossmeyster Aleksey Grebnevni mag'lubiyatga uchratdi. Bu bilan uning ochkolari 4 taga etdi. 

Sakkizinchi tur oldidan Anish Giri 5,5 ochko bilan yakka peshqadam bo'lib turibdi. Nodirbek Abdusattorov 5 ochko bilan qo'shimcha ko'rsatkichlarga ko'ra 2-o'ringa ko'tarilib oldi. Armanistonlik SHant Sargsyan, serbiyaliklar Aleksandar Indjich, Velimir Ivich hamda Nodirbekning bugungi 8-turdagi raqibi BAAlik grossmeyster Salem Saleh hisobida ham 5 ta ochko bor. Ortiq Nig'matov 4 ochko bilan qo'shimcha koeficentlarga ko'ra 24-pog'onaga ko'tarildi. Muhiddin Madaminov 76, Jahongir Vohidov 78-pog'onadan joy olgan. 

Bugun 8-turda Nodirbek Abdusattorov oq donalarda o'zi singari 5 ochkoga ega amirlik grossmeyster Salem Salehga qarshi bahs olib boradi. Ortiq Nig'matov qora donalarda ruminiyalik Devid Gavrileskuga qarshi o'ynaydi. Jahongir Vohidov qora donalarda braziliyalik Jiovanni Veskovi, Muhiddin Madaminov esa oq donalarda polshalik Yakub Simannga qarshi o'ynaydi.