Sharjah Masters 2025. Grossmeysterlarimiz 5-turda qanday natija qayd etishdi?

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda. 

Kecha musobaqada 5-tur uchrashuvlari bo'lib o'tdi. Nodirbek Abdusattorov qora donalarda vengriyalik grossmeyster Adam Kozak bilan durang o'ynadi. Ushbu bahsdan bir necha soat o'tib, afsonaviy Magnus Karlsenga qarshi onlayn match kutib turgani bois, Nodirbek g'alaba uchun tavakkal qilmadi. Ortiq Nig'matov oq donalarda reytingda o'zidan yuqorida turgan hindistonlik Kartik Venkataraman bilan murosaga keldi. 

Afsuski, Sharjah Masters 2025 turnirining 5-turida Muhiddin Madaminov va Jahongir Vohidov oq donalarda harakat qilganlariga qaramay, raqiblariga imkoniyatni boy berib qo'yishdi. Madaminov qozog'istonlik tajribali grossmeyster Rinat Jumabaevga, Vohidov esa eronlik grossmeyster Movahed Sinaga yutqazib qo'ydi. 

Oltinchi tur oldidan xitoylik Dai CHangren, niderlaniyalik Anish Giri va serbiyalik Aleksandar Injich 4 tadan ochko jamg'arib, 1-3 o'rinlarni band etishgan. O'n uch nafar ishtirokchi 3,5 tadan ochkoga ega. Ular orasida Nodirbek Abdusattorov ham bor. Hamyurtimiz qo'shimcha ko'rsatkichlarga ko'ra 13-o'rindan joy olgan. Ortiq Nig'matov 3 ochko bilan qo'shimcha koeficentlarga ko'ra 24-pog'onani band etgan. Muhiddin Madaminov 1,5 ochko bilan 72, Jahongir Vohidov esa 1 ochko bilan 79-pog'onada bormoqda.