Sharjah Masters 2025. Ikkinchi o'zbek derbisida ham Abdusattorov g'alaba qozondi

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda. 

Kecha musobaqada 4-tur uchrashuvlari bo'lib o'tdi va 3-turda bo'lgani singari yana o'ziga xos o'zbek derbisiga guvoh bo'ldik. Jahongir Vohidovga qarshi bahsda turnirdagi ilk g'alabasini qo'lga kiritgan Nodirbek Abdusattorov 4-turda oq donalarda yana bir hamyurtimiz Ortiq Nig'matovni ham taslim etdi. Nig'matov 4-turgacha 2 g'alaba va 1 durang bilan turnir jadvalida Nodirbekdan yuqorida borayotgandi.

Afsuski, Sharjah Masters 2025 turnirining 4-turida qolgan ikki grossmeyterimiz mag'lubiyat alamini totib ko'rdi. Muhiddin Madaminov qora donalarda mezbonlar vakili Salem Salehga, Jahongir Vohidov hama qora donalarda xitoylik Pang Taoga imkoniyatni boy berib qo'ydi. 

Birinchi doskada ikki yarimtadan ochko jamg'argan rossiyalik Ivan Zemlyanskiy va niderlandiyalik Anish Giri uchrashuvi bo'lib o'tdi. Unda Nodirbekdan keyin ikkinchi raqam ostida tasniflangan Giri zafar quchdi.