Sharjah Masters 2025. Nodirbek Abdusattorovda g'alaba va u kuchli uchlikka kirib oldi

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda. 

Kecha musobaqada 6-tur uchrashuvlari bo'lib o'tdi. Nodirbek Abdusattorov oq donalarda hindsitonlik grossmeyster Iniyan Pani mag'lubiyatga uchratdi. Bu bilan turnirning birinchi raqamli shaxmatchisi bo'lgan hamyurtimiz turnir jadvalida 4,5 ochko bilan sof uchinchi o'ringa ko'tarilib oldi. 

Afsuski, Sharjah Masters 2025 turnirining 6-turida qolgan shaxmatchilarimiz qora donalarda o'ynab, ochko yo'qotishdi. Ortiq Nig'matov rossiyalik David Paravyanga, Muhiddin Madaminov hindistonlik Aronyak Goshga imkoniyati boy berdi. Jahongir Vohidov esa yana bir hind grossmeysteri Abhijit Gupta bilan murosaga keldi.

Ettinchi tur oldidan turnirning ikkinchi saralangan shaxmatchisi niderlandiyalik Anish Giri hamda serbiyalik Aleksandar Indjich 5 ochkodan jamg'arib, turnir jadvalida qo'shhokimlik qilishyapti. Nodirbek Abdusattorov kechagi g'alabasi evaziga 4,5 ochko bilan sof uchinchi o'ringa ko'tarilib oldi. 

Etiborga molik jihati shundaki, bugun 7-turda Nodirbek Abdusattorov qora donalarda aynan Anish Giriga qarshi bahs olib boradi. Ehimoliy g'alaba uni chempionlik sari yaqinlashiradi.