Sharjah Masters. Bugun 3-turda o'zbek derbisiga guvoh bo'lamiz

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda.

Bugun musobaqaning 3-tur uchrashuvlari o'tkaziladi va biz uchun ahamiyatlisi unda o'ziga xos o'zbek derbisiga guvoh bo'lamiz. Dastlabki ikki turda durang o'ynagan Nodirbek Abdusattorov qora donalarda Jahongir Vohidovga qarshi bahs olib boradi. Birinchi turda mag'lubiyatga uchragan Vohidov ikkinchi partiyada g'alaba qozongandi. 

Sharjah Masters 2025 turnirining 3-turida Ortiq Nig'matov oq donalarda AQSH shaxmatchisi Akobyan Varujan bilan hisob-kitob qiladi. Nig'matov kecha 2-turda hindistonlik Sankalp Guptani taslim etgandi. Muhiddin Madaminov 3-turda aynan Gupta bilan to'qnash keladi. 

Uchinchi tur oldidan uch shaxmatchi - Dai CHangren (Xitoy), Aleksandar Injich (Serbiya) va Visah (Hindiston) yuz foizlik natija bilan peshqadamik qilyapti. Yigirma etti ishtirokchi hisobida 1,5 tadan ochko bor. Ular orasida Ortiq Nig'matov ham bor. U qo'shimcha ko'rsatkichlarga ko'ra 18-o'rinni egallab turibdi. Bir ochkodan jamg'argan Nodirbek Abdusattorov qo'shimcha koeficentlarga ko'ra 46, Jahongir Vohidov 52-pog'onadan joy olgan. Muhiddin Madaminov 0,5 ochko bilan 63-o'rinda bormoqda.