Sharjah Masters. Bugun 4-turda yana o'zbek derbisiga guvoh bo'lamiz

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda. 

Bugun musobaqada 4-tur uchrashuvlari bo'lib o'tadi va 3-turda bo'lgani singari yana o'ziga xos o'zbek derbisiga guvoh bo'lamiz. Jahongir Vohidovga qarshi bahsda turnirdagi ilk g'alabasini qo'lga kiritgan Nodirbek Abdusattorov bugun 4-turda oq donalarda yana bir hamyurtimiz Ortiq Nig'matovga qarshi bahs olib boradi. Nig'matov 2 g'alaba va 1 durang bilan turnir jadvalida Nodirbekdan yuqorida bormoqda.

Sharjah Masters 2025 turnirining 4-turida Muhiddin Madaminovni jiddiy sinov kutib turibdi. U qora donalarda mezbonlar vakili Salem Saleh bilan hisob-kitob qiladi. Jahongir Vohidov esa qora donalarda xitoylik Pang Taoga qarshi o'ynaydi. Birinchi doskada ikki yarimtadan ochko jamg'argan rossiyalik Ivan Zemlyanskiy va niderlandiyalik Anish Giri uchrashuvi bo'lib o'tadi. 

To'rtinchi tur oldidan to'qqiz nafar shaxmatchi 2,5 tadan ochko jamg'arib, 1-9 o'rinlarni band etgan. Ular orasida Ortiq Nig'matov ham bor. Hamyurtimiz qo'shimcha ko'rsatkichlarga ko'ra 8-o'rindan joy olgan. Uchinchi turdan so'ng ochko yo'qotmagan shaxmatchining o'zi qolmadi. Ikki ochkoga ega Nodirbek Abdusattorov qo'shimcha koeficentlarga ko'ra 46-pog'onadan 26-o'ringa ko'tarilib oldi. Muhiddin Madaminov 1, 5 ochko bilan 43, Jahongir Vohidov esa 1 ochko bila 64-pog'onadan joy olgan.