Sharjah Masters. O'zbek derbisida Abdusattorov ustun, Madaminov va Nig'matovda ham g'alaba

Mukofot jamg'armasi 73 000 AQSH dollarini tashkil etuvchi ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishmoqda. 

Musobaqaning 3-turida o'ziga xos o'zbek derbisiga guvoh bo'ldik. Dastlabki ikki turda durang o'ynagan Nodirbek Abdusattorov qora donalarda Jahongir Vohidovga qarshi bahs olib bordi va g'alaba qozondi. Birinchi turda mag'lubiyatga uchragan Vohidov ikkinchi partiyada g'alaba qozongandi. Derbida tajriba o'z so'zini aytdi. 

Sharjah Masters 2025 turnirining 3-turida Ortiq Nig'matov oq donalarda AQSH shaxmatchisi Akobyan Varujan bilan hisob-kitob qildi va muhim g'alabani qo'lga kiritdi. Nig'matov kecha 2-turda hindistonlik Sankalp Guptani ham taslim etgandi. Muhiddin Madaminov esa kecha 3-turda reytingda o'zidan yuqorida borayotgan aynan Guptani mag'lub etishni uddaladi. Hind grossmeysteri ketma-ket ikki mag'lubiyatini o'zbekistonlik shaxmatchilardan qabul qilib oldi.