SHaxmat. Birgina SHamsiddinda yuz foizlik natija

Aylana tarzda o'tkazilayotgan erkaklar o'rtasidagi musobaqada 5 nafar xalqaro grossmeyster - Nodirbek Abdusattorov (2550, chempionatning birinchi raqamli ishtirokchisi), Saydali Yo'ldoshev (2469), Marat Jumaev (2451), Aleksey Barsov (2411) va Toxir Vohidov (2400) dona suryapti. 

Uchinchi turga kelib birgina SHamsiddin Vohidovgina yuz foizlik natijaga erishib turibdi. U bu safar qora donalarda harakat qilishiga qaramay, Elbek Jumanovni mag'lubiyatga uchratdi. Yosh Nodirbek Abdusattorov qora donalarda o'ynab, tajribali grossmeyster Aleksey Barsovni taslim etdi. 

Javohir Sindarov ham qora donalarda Ulug'bek Tillaevdan ustun keldi. Uchinchi turdan so'ng turnir jadalida SHamsiddin Vohidov 3 ochko bilan peshqadamlik qilyapti. Ikkinchi o'rindan joy olgan Abdusattorov hisobida 2,5 ochko bor. Nikita Xoroshev, Saidakbar Saydaliev va Marat Jumaev hisobida 2tadan ochko bor. 

SHamsiddin Vohidov (o'rtada) o'tgan yili 14 yoshgacha shaxmatchilar orasida Osiyoning eng yaxshisi bo'lgandi