SHaxmat bo'yicha Osiyo chempionatining ilk kuniyoq rapid bo'yicha birinchi bo'ldik + FOTOGALEREYA

21 iyulga qadar davom etadigan XVII Osiyo chempionatida hamyurtlarimizdan tashqari Avstraliya, Bangladesh, Xitoy, Gongkong, Hindiston, Qozog'iston, Qirg'iziston, Malayziya, Mo'g'uliston, Yangi Zelandiya, Qatar, SHri-Lanka, Tojikiston, Turkmaniston, Birlashgan Arab Amirliklari hamda FIDE bayrog'i ostida 7, 9, 11, 13, 15 va 17 yoshgacha bo'lgan o'smir va qizlar g'oliblik uchun dona surmoqda.

Bugun qita birinchiligining ilk kuni 400 nafarga yaqin salohiyat egalari rapid yo'nalishida o'zaro dona surishdi. Quvonarlisi, yakunda O'zbekiston terma jamoasi 4 ta oltin, 5 ta kumush, 5 ta bronza, jami 14 ta medal bilan 17 davlat orasida umumjamoa hisobida birinchi o'rinni egallashdi. 

Mo'g'uliston 4 ta oltin va 1 ta kumush medal bilan ikkinchi o'rinni band etgan bo'lsa, kuchli uchlikka 2 ta oltin, 1 ta kumush, 1 ta bronza medali bilan hindistonlik yosh shaxmatchilar yakun yasashdi. Bugungi bahslarda FIDE, Turkaniston, Qozog'iston, Bangladesh, Yangi Zelandiya va Qirg'iziston terma jamoalari ham o'z hisoblariga Osiyo chempionatining medallarini qo'shib qo'yishdi. 

SHuningdek, bugun Osiyo chempionatining tantanali ochilish marosimi ham o'tkazildi. Ertaga ishtirokchilar klassik yo'nalishda 9 tur davomida o'z mahoratlarini namoyish etishadi. 20 iyul - Xalqaro shaxmat kunida chempionatning blic yo'nalishida ham kuchlilar saralanadi.

Malumot uchun, qita birinchiligida FIDE ustalari va FIDE ustaligiga nomzod shaxmatchilar ham ishtirok etadi.

Suratlar muallifi - Alimurod MAMADAMINOV, o'z muxbirimiz