SHaxmat federaciyasi yil hisobidan so'nggi turnirni o'tkazdi

Yangi yil bayrami oldidan tashkil etilgan 2017 yilning so'nggi taqvim musobaqasida 53 nafar sportchi g'oliblik yo'lida dona surdi. O'g'il bolalar o'rtasidagi bahslarda Adel Rahmon (FM) 7 imkoniyatdan 6,5 ochko to'plab, g'olib bo'ldi.

Kubok sohibiga aylangan Adel 6 g'alaba va bir durang qayd etdi. To'rtta g'alaba va 3ta durang qayd etgan Georgiy SHvanov 5,5 ochko bilan ikkinchi o'rinni egalladi. SHuncha ochko jamg'argan Jamshid Sultonov bronza medaliga sazovor bo'ldi.

Qizlar o'rtasidagi turnirda Yuliya Xegay (WCM) 5 ochko bilan shoxsupaning eng yuqori pog'onasiga ko'tarildi. Faxriylar orasida Lev Kim 5 ochko bilan turnir chempioni bo'ldi. 14 yoshgacha bo'lgan shaxmatchilar bahsida SHerzod Samandarov 5 ochko bilan chempionga aylandi.

Xalqaro reyting ochkolarini beruvchi ushbu musobaqaning blic bahslarida 43 nafar shaxmatchi ishtirok etdi. Samarqandlik Daler Vohidov 7 imkoniyatdan 6,5 ochko jamg'arib, blic turniri g'olibi bo'ldi.

Kuchli uchlikdan Fotix Abduxoliqov (6 ochko) va Jamshid Sultonov (5,5 ochko) joy olishdi. 14 yoshlilar musobaqasida Umida Omonova, qizlar o'rtasida Mahliyo Hakimova oltin medalga sazovor bo'ldi.