SHaxmat Olimpiadasi. Isroil va Niderlandiyaga qarshi uchrashuvlar uchun juftliklar malum

Dunyoning ikki yuzga yaqin davlati terma jamoalari qatnashayotgan nufuzli musobaqada bugun 6-tur uchrashuvlari o'tkaziladi. Amaldagi Olimpiada chempioni hisoblangan O'zbekiston erkaklar terma jamoasi bugun tarkibida to'rt nafar grossmeysteri bor Isroilga qarshi bahs olib boradi. Birinchi taxtada Nodirbek Abdusattorov Maksim Rodshteynga qarshi dona suradi. 

Bugungi raqiblarimiz 3 g'alaba va 2 durang qayd etishgan hamda turnir jadvalida qo'shimcha ko'rsatkichlarga ko'ra 8 ochko bilan 20-pog'onadan joy olgan. Isroil 1-turda Efiopiya terma jamoasini 4:0 hisobida mag'lub etib, keyin ketma-ket Irlandiya va Mo'g'uliston bilan durang (2:2) o'ynadi. Albaniyani 4:0, Kolumbiyani esa 2,5:1,5 hisobida engdi. 

Jami 184 ta terma jamoa qatnashayotgan ayollar o'rtasidagi musobaqada Aleksey Dreev murabbiyligidagi O'zbekiston terma jamoasi ham muvaffaqiyatli odimlamoqda. Qizlarimiz ilk turda Gaiti davlati shaxmatchilarini 4:0, 2-turda Angolani 3:1, 3-turda esa ancha kuchli hisoblangan mezbon Vengriya terma jamoasini 2,5:1,5, 4-turda tarkibida jahon chempioni bo'lgan Bolgariyani 2,5:1,5 hisobida engishdi. Kecha o'tkazilgan 5-turda esa tarkibida uch nafar grossmeyster bo'lgan, Butunjahon shaxmat Olimpiadasining amaldagi vice-chempionlari hisoblangan Gruziyaga munosib qarshilik ko'rsatib, 1,5 : 2,5  hisobida yutqazib qo'yishdi. 

Bugungi raqibalarimiz niderlandiyaliklar 1-turda Madagaskarni 4:0, 2-turda SHimoliy Makedoniyani 3,5:0,5, 3-turda Estoniyani 2,5:1,5 hisobida mag'lub etishdi. To'rtinchi turda tarkibida Gulruhbegim Tohirjonova o'ynayotgan AQSHga 0,5:3,5 hisobida yutqazishdi. Kecha o'tkazilgan 5-turda esa Xorvatiya terma jamoasi 2,5:1,5 hisobida taslim etildi. Niderlandiya ham biz singari 4 g'alaba va 1 mag'lubiyatga ega. O'zbekiston 8 ochko bilan qo'shimcha ko'rsatkichlarga ko'ra 15, Niderlandiya esa 26-pog'onadan joy olgan.  

Malumot uchun, bugungi har ikki uchrashuv bizning vaqt bilan soat 18:15da boshlanadi.