SHaxmat. O'zbekiston chempionati oliy ligasida finalchilar aniqlandi

Erkaklar o'rtasidagi bahslarda taniqli grossmeysterimiz SHamsiddin Vohidovni musobaqadan chiqarib yuborgan istedodli shaxmatchimiz Muhammadzohid Suyarov final ostonasida to'xtatildi. U 1/2 finalda ikki o'yin natijasiga ko'ra grossmeyster Ortiq Nig'matovga 0,5:1,5 hisobida imkoniyatni boy berib qo'ydi. 

Ikkinchi yarim final uchrashuvida grossmeysterlarimiz Nodirbek Yakubboev va Muhiddin Madaminov o'zaro to'qnash kelishdi. Ushbu qarama-qarshilikda Yakubboev 1,5:0,5 hisobida g'alaba qozonib, finalga yo'l oldi.

Ayollar o'rtasidagi mamlakat chempionatining 1/2 finalida tajribali Nodira Nodirjonova reytingda o'zidan ancha yuqorida turgan, yoshlar o'rtasida ikki karra jahon chempioni Afruza Hamdamovadan 1,5:0,5 hisobida ustun keldi. 

Nodirjonovaning finaldagi raqibasi Umida Omonova bo'ladi. U 1/2 finalda Marjona Malikovani 3:1 hisobida dog'da qoldirdi. SHaxmatchilar bittadan g'alabaga erishishdi. Tay-brekning har ikki partiyasida esa Omonova zafar quchdi. Final va 3-o'rin sohibini aniqlab beruvchi o'yinlar ertaga, 26 aprel kuni soat 14:00da boshlanadi.