SHaxmat. Qarshi Open-2018 xalqaro turniri davom etmoqda

Turnirning xalqaro guruhida 6-tur partiyalari o'tkazildi. Birinchi doskada O'zbekiston vakillari uchrashib, unda IM Nodirbek Yoqubboev qora donalarda o'ynashiga qaramay, g'alaba qozondi. 

O'zbekiston chempioni bo'lgan Nodirbek 6 imkoniyatdan 5 ochko jamg'arib, "A" guruhida peshqadamga aylanib oldi. Yoqubboevga imkoniyatni boy bergan FM Akmal Fayzullaev 4,5 ochkoga ega.

Daler Vohidovni (O'zbekiston) mag'lub etgan FM Abdumalik Abdusalimovda ham shuncha ochko bor. 

GM Vitaliy Sivuk (Ukraina)dan ustun kelgan GM Petr Kostenko (Qozog'iston) ham ochkolarini 4,5taga etkazib oldi. 

Finalga uch tur qolgan bir paytda yana 5 ishtirokchi 4 ochkoga ega - ular grossmeysterlar Xamicevich Vladimir (Moldova), Jumaev Marat (O'zbekiston), Yo'ldoshev Saidali (O'zbekiston), Vul Arkadiy E. (Rossiya) va poytaxtlik xalqaro master Vohidov SHamsiddin.  

Ayol shaxmatchilardan eng yaxshi natijaga xalqaro grossmeyster Sarvinoz Qurbonboeva ega bo'lib turibdi. Hamyurtimiz 6 imkoniyatdan 3,5 ochko to'pladi. 

"B" guruhida mamlakatimizning turli viloyatlaridan kelgan istedodli yoshlar dona surishyapti. Ulardan uch nafari peshqadamlar safidan joy olgan. Halimjonov Fayzullo (2006 yilda tug'ilgan), Jo'raev Sanjar (2002 yilda tug'ilgan, ikkisi ham Buxorodan) hamda xalqaro tajribaga ega samarqandlik shaxmatchi WCM Hamdamova Afruza 5ta partiyaning barchasida g'alabaga erishishdi. 

Noraliev Saparali (Sirdaryo), Namozova Xolida (Qashqadaryo) va Sulaymonov Mirabbos (Buxoro) peshqadamlardan yarim ochko kam jamg'arishgan. Yana 17 shaxmatchi 5 imkoniyatdan 4 ochko to'plagan. Bu esa "B" guruhida ham raqobat kuchli ekanligini ko'rsatib turibdi.