SHaxmatchilarimiz Aktobe Open 2024 turnirining 8-turida qanday natija qayd etishdi?

Mukofot jamg'armasi 100 000 AQSH dollarini tashkil etuvchi Aktobe Open 2024 turniri ananaviy tarzda Vladimir Dvorkovich xotirasiga bag'ishlab o'tkazib kelinyapti. Dunyoning ko'zga ko'ringan grossmeysterlari qatorida uch nafar shaxmatchimiz Nodirbek Yakubboev (2665), Muhammadzohid Suyarov (2429) va Muhiddin Madaminov (2504) ham sovrinli o'rinlar uchun dona surishayotgandi.

Afsuski, ulardan Muhiddin Madaminov musobaqa yakunnalishiga uch tur qolgan bir paytda ishtirokini yakunlab bo'ldi. Turnirning 8-turida qolgan ikki vakilimiz oq donalarda harakat qilishdi. Yakubboev kutilmaganda belaruslik Mixail Nikitenko (2525)ga imkoniyatni boy berib qo'ydi. Suyarov esa aksincha, qozog'istonlik Sauat Nurgaliev (2320)ni mag'lubiyatga uchratdi. 

Bugun o'tkaziladigan so'nggi 9-tur oldidan Parham Maqsudlu (Eron, 2732) 7 ochko bilan yakka karvonboshi bo'lib turibdi. U 8-turda hind grossmeysteri Puranik Abhimanyuni mag'lubiyatga uchratib, peshqadamligini mustahkamlab oldi. Aleksey Sarana (Serbiya, 2706), Abhijit Gupta (Hindiston, 2601), SHant Sargsyan (Armaniston, 2637), Aleksandr Predke (Serbiya, 2667) hamda Yakubboevdan ustun kelgan Mixail Nikitenko (Belarus, 2525) 6 tadan ochko jamg'arib, keyingi o'rinlarni band etishgan. Besh ochkoga ega Nodirbek Yakubboev esa qo'shimcha ko'rsatkichlarga ko'ra 16-o'ringa tushib ketdi va sovrinli o'rinlarni egallay olmasligi 100 foiz oydinlashdi. 

Muhammadzohid Suyarov 8-turdan keyin 4,5 ochko bilan 41-pog'onadan 28-o'ringa ko'tarilib oldi. Muhiddin Madaminov esa musobaqadagi ishtirokini 2,5 ochko bilan yakunlab bo'ldi. U hozir jadvalda 74-pog'onadan joy olgan. Bugun so'nggi 9-turda shaxmatchilarimiz qora donalarda harakat qilishadi. 

Aktobe Open 2024. So'nggi 9-tur juftliklari

Saparmirat Atabaev (Turkmaniston, 2514) - Nodirbek Yakubboev (2665) 

Aleksandr Rahmanov (FIDE, 2614) - Muhammadzohid Suyarov (2429)

Malumot uchun, Aktobe Open 2024 turniri g'olibi 20 000 dollar mukofot puliga ega bo'ladi. Ikkinchi o'rin sohibi 15 600, uchinchi o'rin egasi esa 11 100 AQSH dollarini qo'lga kiritadi.