SHaxmatchilarimiz Butunjahon O'smirlar Olimpiadasida Hindiston va Kanadaga qarshi bahs olib borishdi

Nufuzli musobaqada dunyoning 45 davlatidan 90 ta jamoa bosh sovrin uchun bahs olib bormoqda. O'zbekiston terma jamoasi musobaqada o'rtacha reyting bo'yicha 2-o'rinda qayd etilgan. Xalqaro grossmeyster Saydali Yuldashev bosh murabbiyligidagi O'zbekiston terma jamoasi tarkibida xalqaro sport ustalari Humoyun Begmuratov (2435), Muhammadzohid Suyarov (2356), FIDE sport ustasi Asrorjon Omonov va ayollar xalqaro sport ustasi, yoshlar o'rtasida ikki karra jahon chempioni Afruza Hamdamova dona surmoqda. 

Kecha Olimpiadada ikkita tur uchrashuvlari o'tkazildi. O'smirlarimiz avvaliga 7-turda asosiy raqib Hindiston terma jamoasiga 1,5:2,5 hisobida imkoniyani boy berib qo'yishdi. Keyin esa 8-turda Kanada shaxmatchilari 3,5:0,5 hisobida taslim etildi. FIDE 1 jamoasi 8 ta uchrashuvning barchasida g'alaba qozonib, turnir jadvalida yakka peshqadam bo'lib turibdi. 

O'zbekiston terma jamoasi Olimpiadaning 8-turidan so'ng 6 g'alaba va 2 mag'lubiyat bilan 12 ochko jamg'argan holda qo'shimcha ko'rsatkichlarga ko'ra 4-o'rinni egallab turibdi. FIDE 2 jamoasi 13 ochko bilan ikkinchi o'rinni band etgan bo'lsa, Qozog'iston 1 jamoasi biz singari 12 ochko bilan kuchli uchlikka yakun yasagan. Hindiston, Qozog'iston 2, Kolumbiya 1, Italiya va Xitoy terma jamoalari hisobida ham 12 ochkodan bor. 

Bugun so'nggi 9-turda O'zbekiston terma jamoasi Italiya shaxmatchilariga qarshi bahs olib boradi. Birinchi doskada FIDE 1 va FIDE 2 terma jamoalari o'zaro munosabatlariga oydinlik kiritib oladi.