SHaxmatchilarimiz ishtirokidagi "Qonaev Cup 2025" turnirida 2-tur partiyalari o'ynaldi

Uchta guruhda tashkil etilayotgan musobaqada 19 davlatdan jami 268 nafar shaxmatchi sovrinli o'rinlar uchun bahs olib bormoqda. Ushbu turnirda O'zbekiston sharafini 5 nafar shaxmatchimiz himoya qilyapti. 

Mukofot jamg'armasi 78 000 dollarni tashkil etuvchi "Masters" guruhida Muhammadzohid Suyarov (2488) va Humoyun Begmuratov (2466), 15 000 dollar sovrin puliga ega "Challengers" guruhida esa grossmeysterimiz Aleksey Barsov (2323), shuningdek Miraziz Matyakubov (2260) hamda Azamat Daurimbetov (2199) o'z omadini sinab ko'rmoqda.

Ikkinchi turda Muhammadzohid Suyarov oq donalarda o'ynaganiga qaramay qozog'istonlik Ayaulim Kaldarova (2220)ni mag'lub eta olmadi. Uchrashuv durang natija bilan yakuniga etdi. Suyarov 1-turda ham raqib bilan murosaga kelgandi. Humoyun Begmuratov esa oq donalarda mezbonlar vakili Ergali Suleyman (2408)ga imkoniyatni boy berib qo'ydi. Muhammadzohid 1 ochko bilan qo'shimcha ko'rsatkichlarga ko'ra 42, Humoyun esa 0,5 ochko bilan 54-o'rinni band etgan. 

"Challengers" guruhida qatnashayotgan uch nafar vakilimizning bari 1-turda g'alabaga erishgandi. Ikkinchi turda esa kutilmaganda tajribali grossmeysterimiz Aleksey Barsov qozog'istonlik Isabek Tanikin (2110)ga yutqazib qo'ydi. Miraziz Matyakubov va Azamat Daurimbetov ketma-ket ikkinchi g'alabalarini tantana qilishdi. Ular mos ravishda qozog'istonlik shaxmatchilar Rizat Ulan hamda SHingis Borandan ustun keldi. Matyakubov va Daurimbetov 100 foizlik natija bilan peshqadamlar safida bormoqda.