SHaxmatchilarimiz ishtirokidagi "Qonaev Cup 2025" turnirida 5-tur ortda qoldi

Uchta guruhda tashkil etilayotgan musobaqada 19 davlatdan jami 268 nafar shaxmatchi sovrinli o'rinlar uchun bahs olib bormoqda. Ushbu turnirda O'zbekiston sharafini 5 nafar shaxmatchimiz himoya qilyapti. 

Mukofot jamg'armasi 78 000 dollarni tashkil etuvchi "Masters" guruhida Muhammadzohid Suyarov (2488) va Humoyun Begmuratov (2466), 15 000 dollar sovrin puliga ega "Challengers" guruhida esa grossmeysterimiz Aleksey Barsov (2323), shuningdek Miraziz Matyakubov (2260) hamda Azamat Daurimbetov (2199) o'z omadini sinab ko'rmoqda.

Beshinchi turda Muhammadzohid Suyarov qora donalarda o'ynaganiga qaramay, hindistonlik Vaz Etanni mag'lubiyatga uchratdi. Ochkolarini 3 taga etkazib olgan Suyarov qo'shimcha ko'rsatkichlarga ko'ra 25-o'ringa ko'tarilib oldi. O'n ikkinchi o'rindan joy olgan qozog'istonlik Daniyal Sapenov hisobida ham 3 ochko bor. Humoyun Begmuratov ham bu turda qora donalarda o'ynadi. Yosh shaxmatchimiz mezbonlar vakili Satbek Axmedinov bilan murosaga keldi. Humoyun 2 ochko bilan 48-pog'onani band etgan. Bu 2 ochkoliklar orasidagi eng yomon ko'rsatkich. 

Biroz avval boshlangan 6-tur uchrashuvida Muhammadzohid Suyarov oq donalarda  qozog'istonlik Ergali Suleymanga, Humoyun Begmuratov esa AQSH vakili Maksimilyan Luga qarshi bahs olib bormoqda. Turnir jadvalida 4 ochkodan jamg'argan 4 shaxmatchi - Amin Bassem (Misr), Ayush SHarma (Hindiston), Aleksey Grebnev (FIDE) va Aditya Mittal (Hindiston) peshqadamlik qilyapti.      

"Challengers" guruhida qatnashayotgan uch nafar shaxmatchimizning bari 5-turda g'alabaga erishdi. Tajribali grossmeysterimiz Aleksey Barsov qozog'istonlik Amirali Abzalni, Miraziz Matyakubov yana bir mezbon shaxmatchi Isabek Tanibekni, Azamat Daurimbetov esa qirg'izistonlik Aziz Umarbekovdan ustun keldi. Har uch shaxmatchimiz ochkolarini 4 taga etkazib olishdi. 

Qo'shimcha ko'rsatkichlarga ko'ra Matyakubov 6, Daurimbetov 8, Barsov esa 10-o'rinni band etgan. Uch nafar ishtirokchi 4,5 tadan ochko jamg'arib, "Challengers" guruhida karvonboshilik qilmoqda. Ayni daqiqalarda o'tkazilayotgan 6-turda Miraziz Matyakubov  qozog'istonlik Abilmansur Abdilxayirga, Barsov qirg'izistonlik Nurgazi Jinbekovga, Daurimbetov esa yana bir mezbon shaxmatchi Dinmuhammed Tulendinovga qarshi dona surmoqda.