SHaxmatchilarimiz Jahon chempionatida 3 ta oltin medal bilan umumjamoa hisobida ikkinchi bo'lishdi!

Quvonarlisi, ushbu dunyo birinchiligida o'zbekistonlik yosh shaxmatchilar ham muvaffaqiyatli ishtirok etishdi. 

Sarvinoz Begmuratova 13 yoshgacha qizlar o'rtasida 9 imkoniyatdan 7,5 ochko to'plab, biror mag'lubiyatsiz chempionlikni qo'lga kiritdi. Sarvinoz ushbu muvaffaqiyati bilan FIDE Women FIDE Master (WFM) unvonini olish imkoniyatiga ham ega bo'ldi.

Nilufarxon Imomqo'zieva 15 yoshgacha qizlar o'rtasida 7 ochko jamg'arib, musobaqa g'olibasiga aylandi. U Serbiya, Ruminiya, Hindiston, Kuba va Gruziyaning kuchli shaxmatchilarini mag'lubiyatga uchratib, xalqaro reytingini 60 punktga oshirishga muvaffaq bo'ldi.

Nurmuhammad Nematillaxonov esa 9 yoshgacha bo'lgan o'g'il bolalar o'rtasida 7,5 ochko jamg'arib, oltin medalni qo'lga kiritdi. 

Jahon chempionati yakunlariga ko'ra, O'zbekiston terma jamoasi 3 ta oltin, 2 ta kumush va 2 ta bronza medali bilan Qozog'iston vakillaridan keyin ikkinchi o'rinni egalladi.

O'zbekiston shaxmat federaciyasi matbuot xizmati