SHaxmatchilarimiz U-16 Butunjahon O'smirlar Olimpiadasida yana ikki uchrashuv o'tkazishdi

Nufuzli musobaqada dunyoning 45 davlatidan 90 ta jamoa bosh sovrin uchun bahs olib bormoqda. O'zbekiston terma jamoasi o'rtacha reyting bo'yicha 2-o'rinda qayd etilgan bo'lib, shaxmatchilarimiz Butunjahon Olimpiadasini ketma-ket 3 ta g'alaba bilan boshlashgandi.   

Xalqaro grossmeyster Saydali Yuldashev bosh murabbiyligidagi O'zbekiston terma jamoasi tarkibida xalqaro sport ustalari Humoyun Begmuratov (2435), Muhammadzohid Suyarov (2356), FIDE sport ustasi Asrorjon Omonov va ayollar xalqaro sport ustasi, yoshlar o'rtasida ikki karra jahon chempioni Afruza Hamdamova dona surmoqda. 

Kecha Olimpiadada ikkita tur uchrashuvlari o'tkazildi. O'smirlarimiz avvaliga 4-turda Qozog'iston 2 jamoasini 3:1 hisobida mag'lub etishdi. Beshinchi turda esa musobaqa reyting peshqadami FIDE 1 jamoasiga 0,5:3,5 hisobida imkoniyatni boy berib qo'yishdi. Muhammadzohid Suyarov grossmeyster Ivan Zemlyanskiy bilan durang o'ynadi. Qolgan shaxmatchilarimiz grossmeyter raqiblariga yutqazib qo'yishdi. SHu turgacha 4 ta uchrashuvda g'alaba qozongan Hindiston va Kolumbiya 1 terma jamoalari bahsida hindlar 3:1 hisobida ustun kelishdi.  

O'zbekiston terma jamoasi Olimpiadaning 5-turidan so'ng 4 g'alaba va 1 mag'lubiyat bilan 8 ochko jamg'argan holda qo'shimcha ko'rsatkichlarga ko'ra 5-o'rinni egallab turishibdi. Barcha uchrashuvlarda g'alaba qozongan Hindiston va FIDE 1 jamoalari 10 ochkodan to'plab, turnir jadvalida qo'shhokimlik qilishyapti.  

Bugun 6-turda O'zbekiston terma jamoasi FIDE 2 jamoasiga qarshi bahs olib boradi. Birinchi doskada Hindiston va FIDE 1 terma jamoalari o'zaro munosabatlariga oydinlik kiritib olishadi.