SHaxmatchilarimizga etibor oshmoqda + FOTO

SHaxmat sportini rivojlantirishga shaxsan mamlakatimiz rahbari tomonidan etibor qaratilmoqda. Bunga javoban shaxmatchilarimiz ham jahon arenalarida sezilarli yutuqlarga erishib kelishmoqda. 

Bugun poytaxtimizda shaxmatchilarimizni qo'llab-quvvatlashga qaratilgan yana bir tadbir tashkil etildi. Unda O'zbekiston yoshlar siyosati va sport vazirining birinchi o'rinbosari Alisher Sadullaev, BMB Trade Group kompaniyasi kuzatuv kengashi raisi Bekzod Mamatqulov, shaxmatchilarimiz Umida Omonova va Humoyun Bekmurodov, OAV xodimlari va boshqalar ishtirok etishdi.

Tadbir davomida endilikda shaxmatchilarimiz Umida Omonova va Humoyun Bekmurodovga BMB Trade Group kompaniyasi tomonidan homiylik qilinishi haqida malum qilindi.

"Har ikki shaxmatchimizning ham istiqboli bor. Ayni paytda mamlakatimizda 27 nafar grossmeyster bor. Yaqin yillarda ular sonini yanada oshiramiz. Umida va Humoyun hozircha grossmeyster emas. Ammo to'g'ri yo'naltirilgan "investiciya" evaziga ularni 3-4 yil ichida jahonning top shaxmatchilari qatorida ko'rishimiz mumkin.

Yaqin orada boshqa shaxmatchilarimizga ham mana shunday homiylar biriktirilishi rejasi bor", - dedi Alisher Sadullaev tadbir davomida.

O'z navbatida shaxmatchilar bunday etibordan xursand ekanliklarini qayd etishdi.