SHaxmatchimiz SHarjadagi turnirda sovrindor bo'ldi

O'z tarixida 23-bor tashkil etilgan musobaqa shaxmatning tezkor hamda blic yo'nalishlarida o'tkazildi. Xalqaro turnirda o'zbekistonlik yosh shaxmatchilardan - amaldagi O'zbekiston chempioni, xalqaro toifadagi sport ustasi Nodirbek Yoqubboev, shuningdek, Abdumalik Abdusalimov va Suhrob Komiljonov ishtirok etdi. 

Musobaqaning tezkor shaxmat bahslari shveycarcha tizimda o'tkazilib, g'olib va sovrindorlar 9 tur natijasiga ko'ra aniqlandi. Unda 7,5tadan ochko jamg'argan xalqaro grossmeysterlar - greciyalik Efstratios Grivas hamda kubalik Arensibia Rodriges birinchi va ikkinchi o'rinlarni bo'lishib olishdi. 

Bir yo'la to'rt nafar ishtirokchi 7tadan ochko to'pladi. Ular orasida eng yaxshi qo'shimcha ko'rsatkichga ega bo'lgan hamyurtimiz Nodirbek Yoqubboev bronza medalini qo'lga kiritdi. SHuningdek, Yoqubboev 16 yoshgacha bo'lgan tengqurlari orasida birinchi o'ringa sazovor bo'ldi. FIDE ustasi Abdumalik Abdusalimov 16 yoshgacha shaxmatchilar orasida ikkinchi, umumiy hisobda 7 ochko bilan 6-o'rinni band etdi. 

Xalqaro turnirning rapid bahslarida esa bu ikki shaxmatchimiz kuchli o'nlikdan joy olishdi. Yoqubboev 9 imkoniyatdan 7, Abdusalimov esa 6,5 ochko bilan 10-o'rinni egalladi. Etiborlisi, Abdumalik yosh bo'lishiga qaramay xalqaro grossmeysterlar Konstantin Land va Dmitriy Komarovlarni mag'lub etishning uddasidan chiqdi.