Sinquefield Cup 2025. Nihoyat, Nodirbek Abdusattorovda uzoq kutilgan g'alaba

Dunyoning ko'zga ko'ringan va reytingi yuqori 10 nafar grossmeysteri jam bo'lgan ushbu musobaqada hamyurtimiz Nodirbek Abdusattorov (2771) ham ishtirok etmoqda. SHaxmatchimiz ketma-ket omadsizliklardan so'ng nihoyat, musobaqadagi ilk g'alabasini qo'lga kiritdi. U oq donalarda franciyalik Alireza Firuzdjani mag'lub etishning uddasidan chiqdi. 

Grossmeysterimiz bungacha o'tkazilgan 7 ta uchrashuvning 4 tasida raqiblariga imkoniyatni boy bergan, 3 tasida esa durangga rozi bo'lgandi. Kechagi g'alabadan keyin Nodirbek ochkolarini 2,5 taga etkazib oldi, lekin so'nggi 10-o'rindan tepaga ko'tarila olmadi. To'qqizinchi pog'onadan joy olgan va aynan Nodirbekka imkoniyati boy bergan Alireza hisobida 3 ochko bor. Amaldagi jahon chempioni Gukesh Dommaradju 3,5 ochko bilan 8-o'rinni band etgan.  

Sinquefield Cup 2025 turnirining 8-tur qolgan barcha partiyalarida durang natija qayd etildi. Turnir jadvalida amerikalik Fabiano Karuana va hindistonlik Rameshbabu Praggnanandha 5 ochkodan to'plab, qo'shhokimlikni davom ettirishyapti. Amerikaliklar Levon Aronyan va Uesli So hisobida 4,5 tadan ochko bor. 

Bugun musobaqada so'nggi 9-tur uchrashuvlari o'tkaziladi. Nodirbek Abdusattorov qora donalarda Uesli Soga qarshi bahs olib boradi. Uchrashuvlar bizning vaqt bilan soat 22:30da boshlanadi.