Sinquefield Cup. Nihoyat, Nodirbek Abdusattorov ilk g'alabasini qo'lga kiritdi

Grand Chess Tour musobaqasining beshinchi bosqichi hisoblangan ushbu turnirning mukofot jamg'armasi 350 000 AQSH dollarini tashkil etadi. G'olib shaxmatchi 100 000 dollarga ega chiqadi. Musobaqada dunyoning 10 nafar kuchli grossmeysterlari bosh sovrin uchun bahslarga kirishdi. Ular orasida jahon chempioni Nodirbek Abdusattorov (2762) ham bor. 

Turnirning 7-turida hamyurtimiz oq donalarda Uesli So (AQSH, 2751)ni mag'lubiyatga uchratdi. Bu Nodirbekning ushbu turnirdagi ilk g'alabasi bo'ldi. Abdusattorov bungacha 5 durang va 1 mag'lubiyatga ega bo'lib turgandi. Kechagi g'alabadan keyin u 3,5 ochko bilan 9-pog'onadan qo'shimcha ko'rsatkichlarga ko'ra 5-o'ringa ko'tarilib oldi. Uchinchi o'rinni egallab turgan Dommaradju Gukesh (Hindiston, 2766) hisobida ham 3,5 ochko bor. 

Ettinchi turda Nodirbekdan tashqari musobaqada peshqadamlik qilayotgan Alireza Firuzja (Franciya, 2751) ham g'alabaga erishdi. Farang grossmeysteri oq donalarda o'ynab, Din Lijen (Xitoy, 2745)ni taslim etdi. U 5 ochko bilan yakka karvonboshi bo'lib turibdi. To'rt ochko bilan 2-o'rinni band etgan turnirning birinchi saralangan shaxmatchisi Fabiano Karuana (AQSH, 2793) bu turda oq donalarda Gukesh bilan murosaga keldi. 

Turnir ishtirokchilari: Fabiano Karuana (AQSH, 2793), Yan Nepomnyashhiy (FIDE, 2767), Dommaradju Gukesh (Hindiston, 2766), Nodirbek Abdusattorov  (O'zbekiston, 2762), Uesli So (AQSH, 2751), Alireza Firuzja (Franciya, 2751), Rameshbabu Pragnanandxa (Hindiston, 2749), Anish Giri (Niderlandiya, 2746), Din Lijen (Xitoy, 2745), Maksim Vashe-Lagrav (Franciya, 2721).

Bugun turnirda 8-tur partiyalari o'ynaladi. Nodirbek Abdusattorov qora donalarda Din Lijen (Xitoy, 2745) bilan hisob-kitob qiladi. Din 3 ochko bilan 8-pog'onadan joy olgan. So'nggi pog'onadagi niderlandiyalik Anish Giri hisobida 2,5 ochko bor.