Sinquefield Cup. Nodirbek Abdusattorov amaldagi jahon chempioni bilan durang o'ynadi

Grand Chess Tour musobaqasining beshinchi bosqichi hisoblangan ushbu turnirning mukofot jamg'armasi 350 000 AQSH dollarini tashkil etadi. G'olib shaxmatchi 100 000 dollarga ega chiqadi. Musobaqada dunyoning 10 nafar kuchli grossmeysterlari bosh sovrin uchun bahslarga kirishdi. Ular orasida jahon chempioni Nodirbek Abdusattorov (2762) ham bor. 

Turnirning 8-turida hamyurtimiz qora donalarda amaldagi jahon chempioni Din Lijen (Xitoy, 2745)ga qarshi bahs olib bordi va durangga imzo chekdi. To'rt ochkoga ega Nodirbek 1 g'alaba, 6 durang va 1 mag'lubiyat bilan turnir jadvalida qo'shimcha ko'rsatkichlarga ko'ra 4-o'rinni egallab turibdi. Uchinchi pog'onadagi Usli So (AQSH, 2751)da ham 4 ochko bor. 

Etiborlisi, 8-turdagi barcha partiyalarda tomonlar murosaga kelishdi. Musobaqada 5,5 ochko bilan peshqadamlik qilayotgan Alireza Firuzja (Franciya, 2751) bu turda qora donalarda Yan Nepomnyashiy (FIDE, 2767) bilan durang o'ynadi. 

Bugun musobaqaning so'nggi 9-turida Nodirbek Abdusattorov oq donalarda turnirning ikkinchi raqamli ishtirokchisi Yan Nepomnyashiyga qarshi bahs olib boradi. G'alaba qozongan taqdirda, musobaqani sovrindorlar safida yakunlashi mumkin. 

Turnir ishtirokchilari: Fabiano Karuana (AQSH, 2793), Yan Nepomnyashhiy (FIDE, 2767), Dommaradju Gukesh (Hindiston, 2766), Nodirbek Abdusattorov (O'zbekiston, 2762), Uesli So (AQSH, 2751), Alireza Firuzja (Franciya, 2751), Rameshbabu Pragnanandxa (Hindiston, 2749), Anish Giri (Niderlandiya, 2746), Din Lijen (Xitoy, 2745), Maksim Vashe-Lagrav (Franciya, 2721).