Sirochbek Ismoilov yagona mag'lubiyatini SHakur Stivensondan qabul qilib olgan yapon bokschisini taslim etdi! Uch nafar bokschimiz Koreyadagi prof boks oqshomida jang qildi

Oqshom doirasida jami uch nafar hamyurtimiz ringga ko'tarildi.

Jumladan, markaziy jangda 24 yashar andijonlik bokschimiz, WBA Asia kamari sohibi Sirochbek Ismoilov yaponiyalik tajribali SHuichiro Yoshinoga qarshi bahs olib bordi. Engil vazn toifasida tashkil etilgan 12 raundlik jang 11-raundda nihoyasiga etdi. Ismoilov 33 yoshli raqibini texnik nokaut orqali muddatidan oldin mag'lubiyatga uchratishning uddasidan chiqdi.

Bu Sirochbekning faoliyatidagi o'ninchi jangida qo'lga kiritgan o'ninchi g'alabasi bo'ldi. U g'alabalarining ettitasini muddatidan avval qo'lga kiritgan. Yoshino (17-2, 13 KO) esa kecha karerasidagi ikkinchi mag'lubiyatini qabul qilib oldi. U bungacha yagona bo'lib turgan muvaffaqiyatsizligini 2023 yil aprel oyida engil vazn toifasida WBC chempioni SHakur Stivensondan qabul qilgandi.

Turnir doirasida Andijonda tug'ilgan yana bir bokschimiz — Egamberdi Nuriddinov boshqa bir o'zbek bokschisi Jamshid Rihsiev bilan to'qnash keldi. O'rta vazn toifasida o'tkazilgan 10 raundlik jang to'liq davom etib, yakunda Nuriddinov ochkolar hisobiga ko'ra g'alaba qozondi.

Endi Egamberdi Nuriddinov hisobida 8 ta g'alaba va 1 ta durang mavjud, Rihsievning rekordi esa 14-7-1 ko'rinishida.