"Sport" telekanali nima uchun Osiyo o'yinlari translyaciyasini to'liq bermayapti? Zohid Karimov javob berdi

O'yinlarni O'zbekiston hududida namoyish etish MTRK, jumladan "Sport" telekanaliga tegishli hisoblanadi. Biroq, telekanal barcha sport turlarini, ayniqsa o'zbekistonlik muxlislar uchun qiziq bo'lgan boks, dzyudo, taekvondo, futbol kabi sport turlarini to'liq jonli efirda namoyish etmayapti.

Ushbu holat yuzasidan "Sport" telekanali direktori Zohid Karimov Olamsport.com saytiga quyidagilarni malum qildi:

"Buning sabablari bor, albatta. Biz tayyor signal kelib turganida, atayin boshqa sport turlarini namoyish etadigan darajada emasmiz. 

Ikki kundan beri Xitoyda muzokaralar olib  boryapmiz. Tashkilotchilar bizga 6 ta signal berishmoqda xolos. Eng qizig'i, chim ustida xokkey, skvosh, basketbol, voleybol, kriket va bizning sportchilar ishtirok etmaydigan boshqa sport turlari translyaciyasini taqdim etishyapti. 

Sport turlari bo'yicha beriladigan signallar vaqt bilan belgilab qo'yilgan. Masalan dzyudo soat 9:00dan boshlab beriladi va biz buni namoyish etmoqdamiz. SHuningdek, taekvondo 11:00dan boshlab taqdim etilishi mumkin. Qilichbozlik ham saralash bahslarini bermayapti. Asosan kechki dasturlar signali berilmoqda. To'g'ri, kun boshida bizga kerak bo'lmagan sport turlari signali berilmoqda. Kecha biz yana o'zimizning sportchilar ishtirok etadigan signallar zarurligini malum qildik. 

Kecha futbol bo'yicha O'zbekiston - Gonkong uchrashuvini ham faqatgina yozib olingan variantini berishdi. Biz ham muxlislarning kayfiyatini ko'tarish uchun harakat qilyapmiz.

Tashkilotchilarning malum qilishicha, dzyudo va taekvondo bellashuvlarida faqatgina bitta tatami (dayan) tasvirga olinmayapti. Aynan bizga kerakli bahslar bazi holatlarda tasvirga tushmayapti. Biz esa hamyurtlarimiz ishtirokidagi bahslarni o'z kameralarimiz bilan translyaciya qilmoqchimiz. Hozir shuning harakatidamiz. Yana bir bor takrorlayman, biz o'zimizga o'zimiz dushman emasmiz.

Agar savollar tug'ilsa, hech qachon javob berishdan qochmaymiz", - dedi Zohid Karimov Olamsport.com saytiga bergan intervyusida.