Srechko Katanec Parij-2024`da ishtirok etgan Olimpiya terma jamoamiz haqida qanday fikrda?

Ushbu intervyu davomida bosh murabbiyga Parijdagi Olimpiadada ishtirok etgan O'zbekiston OTJ haqida ham savol berildi.

- Olimpiya o'yinlarini ham kuzatdingizmi? O'zbekiston olimpiya terma jamoasining tarixiy ishtirokiga baho berib o'tsangiz. Bizga nima etishmadi deb o'ylaysiz?

- Yomon ishtirok etmadik. "Nima etishmadi?", degan savolga javob berish noto'g'ri. Men kimlargadir baho berishni yoqtirmayman. Franciyada jamoa qanday holatda bo'lganidan ham xabarim yo'q. Ularning holatini bilmay turib, bir nima deyish noto'g'ri. O'zbekiston terma jamoasi har bir uchrashuvda raqibdan yomon o'ynamadi. O'yin sifati bo'yicha baho beryapman. Bunday darajadagi o'yin davomida ega bo'ladigan 1-2 ta xavfli vaziyatni golga aylantirish kerak xolos. Gol urmasangiz, g'alaba qozonishning iloji yo'q.

Olimpiada – ancha yuqori darajali musobaqa. Ayniqsa, Ispaniyadek raqib bilan bir guruhdan joy olish. Bu gapim bilan faqatgina Ispaniya terma jamoasi kuchli edi demoqchi emasman. Qolgan ikki jamoa ham raqobatbardosh edi. Meni O'zbekistonda hayratga soladigan bir jihat bor. Biz o'zimizni ustunroq qo'yamiz va raqibdan kuchli bo'lishni istaymiz.

Masalan, Dominikan Respublikasi, o'zbeklar uchun Dominikan qandaydir futboli kuchsiz oddiy bir mamlakat, lekin Dominikan ham rivojlanmoqda va ular ham futbol o'ynashni biladi. Biz har doim o'zimizni ustunroq qo'yamiz. Kimga qarshi o'ynaymiz? – Maldiv orollari, ular oson raqib, deb gapirib qo'yamiz, o'zimizcha. Raqib kim? – Dominikan. Ularga qarshi o'ynash oson, shunday fikrlarni har doim eshitaman. Dunyoning har bir mamlakatida futbol rivojlanmoqda. Barcha mamlakatlar terma jamoasini kuchaytirish maqsadida yuribdi. Barcha terma jamoalar yaxshi murabbiylarni taklif etmoqda va rivojlanish yo'lida tinmayapti. Biz har bir raqibni hurmat qilishimiz kerak. To'g'ri, 10-15 yil muqaddam terma jamoangiz o'sha raqibni 10:0 yoki 7:0 hisobida mag'lub etgan bo'lishi mumkin, ammo hozir zamon o'zgardi. Ikkinchi saralash bosqichida ham hech kim osonlikcha mag'lub etilgani yo'q, 7:0, 8:0 kabi yirik hisoblar qayd etilmadi", - dedi Srechko Katanec championat.asia saytiga.