Stol tennischilar onlayn mashg'ulot o'tkazdi

Mamlakatimizda har qanday sharoitda ham jismoniy tarbiya va sport bilan shug'ullanishning imkoni mavjudligi, ayni damda hukm surayotgan karantin davrida ham o'z isbotini topmoqda. Yoshlarimizning sportga bo'lgan mehri, o'z maqsadi yo'lida barcha qiyinchiliklarni engib o'tishga tayyorligi sabab o'z uylarida bo'lsalarda, murabbiylar tomonidan belgilab berilgan mashqlarni bajarmoqda.

Jumladan, kecha 4 may kuni Saida Mahmudova boshchiligida o'tgan stol tennisi bo'yicha mashg'ulotlar, tennischilarning jismoniy holatini yaxshilash va texnikalarini yanada oshirishga katta hissa qo'shdi. Jismoniy tarbiya va sport vazirligi hamda Milliy olimpiya qo'mitasi tavsiyasi bilan onlayn tarzda o'tgan mashqlarni stol tennisi federaciyasi shifokori va ruhshunosi kuzatib bordi.
– Sportchilarning muvaffaqiyatga erishishlari uchun ruhan tetik bo'lishlari shart. SHu bois ham terma jamoamizning har bir mashg'ulotini muntazam kuzatib boraman va ularga kerakli tavsiyalarni beraman, – deydi Umid Sabitov. – Ayniqsa, bugungi kunda sportchilarimiz karantin holatida o'z uylarida shug'ullanmoqdalar. Bu esa ularning ruhi holatlari bir maromda bo'lishi biroz qiyin bo'ladi. Federaciyamiz tomonidan yaratilgan imkoniyatlar sabab, men har kuni ular bilan suhbatlashib, kerakli tavsiyalarni bermoqdaman.

O'zbekiston stol tennisi federaciyasi matbuot xizmati