Stol tennisi. Qizlarimizdan hech kim Parij-2024 Olimpiadasiga bormaydi, yigitlarda imkoniyat bor

Markaziy Osiyo mintaqaviy saralash turnirida ishtirokchilar uchta guruhga bo'lingan holda bahslarga kirishishgandi. Bugun o'tkazilgan guruh bosqich bahslaridan so'ng pley-offga yo'l olgan stol tennischilar malum bo'ldi. 

Afsuski, saralashni ikkita g'alaba bilan boshlagan hamyurtimiz Rozalina Xadjieva ikkita g'alabadan keyin eronlik raqibasiga yutkazib qo'ydi. Yakunda uchchala tennischi ham 5 ochkodan to'pladi. Setlardagi farq bo'yicha qozog'istonlik Sarvinoz Mirkadirova va eronlik Mahshid Ashtari 1/2 finalga yo'l oldi. Rozalina alamli tarzda guruh bosqichida qolib ketdi. Yana bir vakilamiz Marhabo Magdieva ham omadsizlikka uchradi. 

Erkaklar o'rtasidagi bahslarda Rio Olimpiadasi ishtirokchisi bo'lgan Zohid Kenjaev hamda SHohruh Iskandarov 1/4 final ishtirokchisiga aylanishdi. Iskandarov eronlik Nima Alamyanga qarshi bahs olib boradi. G'alaba qozongan taqdirda, uni 1/2 finalda qozog'istonlik Kirill Gerasimenko kutib turibdi. Kenjaev esa qirg'izistonlik Azamat Ergashev bilan to'qnash keladi. Ushbu juftlik g'olibi 1/2 finalda eronlik Noshad Alamyan bilan hisob-kitob qiladi. 

Eslatib o'tamiz, erkaklar va ayollar turnirida faqat g'oliblargina Parij-2024 Olimpiadasi licenziyasini qo'lga kiritadi. Yarim final va final uchrashuvlari ertaga o'tkaziladi.