Superbet Chess Classic Romania. Nodirbek Abdusattorov ilk g'alabasini qo'lga kiritdi

Grand Chess Tour 2025 tasnifiga kiruvchi — Superbet Chess Classic Romania turnirining mukofot jamg'armasi 350 000 AQSH dollarini tashkil qiladi. G'olib umumiy summaning 100 000 dollariga ega bo'ladi. Dunyoning ko'zga ko'ringan grossmeysterlari qatorida bosh sovrin uchun Nodirbek Abdusattorov ham kurash olib bormoqda. 

Grossmeysterimiz kecha o'tkazilgan 7-tur uchrashuvida nihoyat musobaqadagi birinchi g'alabasini qo'lga kiritdi. U oq donalarda polshalik xalqaro grossmeyster Yan-Krishtof Dudani mag'lubiyatga uchratdi. Nodirbek 8-tur oldidan 1 g'alaba, 5 durang va 1 mag'lubiyat bilan 3,5 ochko jamg'argan holda qo'shimcha ko'rsatkichlarga ko'ra 7-o'ringa ko'tarilib oldi. Beshinchi o'rindagi Levon Aronyan hisobida ham 3,5 ochko bor. 

Ettinchi turning qolgan barcha partiyalarida tomonlar durangga imzo chekishdi. To'rt nafar shaxmatchi 4 ochkodan to'plab, kuchli to'rtlikdan joy olgan. Qo'shimcha ko'rsatkichlarga ko'ra Fabiano Karuana peshqadam bo'lib turibdi. Amaldagi jahon chempioni, hindistonlik Gukesh Dommaradju uchun Ruminiyadagi turnir omadsiz o'tmoqda. U 2,5 ochko bilan so'nggi 10-o'rinni band etgan. 

Bugun musobaqaning 8-tur uchrashuvlari o'tkaziladi. Nodirbek Abdusattorov turnir jadvalida ikkinchi o'rinni egallab turgan franciyalik Alireza Firuzdjaga qarshi qora donalarda o'ynaydi.