Superbet Chess Classic Romania. Nodirbek Abdusattorov peshqadamdan ochko tortib oldi

Grand Chess Tour 2025 tasnifiga kiruvchi — Superbet Chess Classic Romania turnirining mukofot jamg'armasi 350 000 AQSH dollarini tashkil qiladi. G'olib umumiy summaning 100 000 dollariga ega bo'ladi. Dunyoning ko'zga ko'ringan grossmeysterlari qatorida bosh sovrin uchun Nodirbek Abdusattorov ham kurash olib bormoqda. 

Grossmeysterimiz kecha o'tkazilgan 6-tur uchrashuvida qora donalarda peshqadamlardan biri franciyalik Maksim Vashe-Lagravga qarshi bahs olib bordi va durangga imzo chekdi. Hozircha Nodirbek hisobida g'alaba yo'q. U 5 ta partiyada durang o'ynab, bittasida mag'lubiyat alamini totib ko'rgan. 

Amaldagi jahon chempioni, hindistonlik Gukesh Dommaradju uchun Ruminiyadagi turnir omadsiz o'tmoqda. Bu safar Gukesh 6-turda francuz Alireza Firuzdjaga yutqazib qo'ydi. Oltinchi turning qolgan partiyalarida shaxmatchilar murosa yo'lini tanlashdi. 

Turnir jadvalida 4 shaxmatchi - Fabiano Karuana, Alireza Firuzdja, Maksim Vashe-Lagrav va Rameshbabu Praggnanandha 3,5 ochkodan jamg'arib, peshqadamlik qilishyapti. Nodirbek Abdusattorov 2,5 ochko bilan 8-pog'onadan joy olgan. Ikki ochkoga ega Gukesh so'nggi 10-o'rinni band etgan.

 Bugun Abdusattorov 7-turda o'zi singari 2,5 ochko jamg'arib, 9-pog'onada borayotgan polshalik Yan-Krishtof Dudaga qarshi oq donalarda o'ynaydi.