SuperUnited Rapid & Blitz Croatia 2026. Nodirbek blicda ham, umumiy ro'yxatda ham 2-o'ringa ko'tarildi!

Grand Chess Tour’ning uchinchi bosqichi hisoblangan SuperUnited Rapid & Blitz Croatia 2026 turnirida hamyurtimiz Nodirbek Abdusattorov ham ishtirok etyapti. Musobaqa rapid va blic bo'yicha o'tkazilayotgan bo'lib, 10 nafar grossmeyster bosh sovrin uchun bahs olib bormoqda. 

Turnir ishtirokchilari: Nodirbek Abdusattorov, Alireja Firuzdja, Maksim Vashe-Lagrav (ikkisi ham Franciya), Rameshbabu Praggnanandha, Gukesh Dommaradju (ikkisi ham Hindiston), Anish Giri, Yorden Van Forest (ikkisi ham Niderlandiya), Vinsent Keymer (Germaniya), Bogdan-Daniel Dik (Ruminiya), Ivan Sarich (Xorvatiya).

Musobaqa formati va vaqt nazorati:

Rapid: 25 daqiqa + 10 soniya (9 raund)

Blic: 5 daqiqa + 2 soniya (18 raund)

Turnirning rapid bahslarida Nodirbek Abdusattorov 11 ochko bilan 3-o'rinni band etgandi. Kechadan blic, yani tezkor shaxmat bo'yicha 18 turdan iborat bahslar boshlandi. Birinchi kun 9 ta tur uchrashuvlari o'tkazildi. Grossmeysterimiz amaldagi jahon toji sohibi hindistonlik Gukesh Dommaradju, franciyalik Maksim Vashe-Lagrav, germaniyalik Vinsent Keymer, niderlandiyalik Anish Giri, ruminiyalik Bogdan-Daniel Dikni mag'lubiyatga uchratdi. Hindistonlik Rameshbabu Pragnanandha va peshqadam Alireza Firuzdjaga qarshi kechgan bahslarda imkoniyatni boy berdi. Xorvatiyalik Ivan Sarich va niderlandiyalik Yorden Van Forest bilan durang o'ynadi. 

Abdusattorov blic bahslarida 6 ochko bilan turnir jadvalida 2-o'rinni egallab turibdi. Alireza Firuzdja 8 ochko bilan peshqadam bo'lib turibdi. Agar kecha o'zaro o'yindagi juda yaxshi vaziyatda g'alabani tantana qilganida Nodirbek Alirezaning o'rnida karvonboshi bo'lardi. Uchinchi pog'onadan joy olgan yana bir francuz Maksim Vashe-Lagrav hisobida ham 6 ochko bor. 

Nodirbek rapid va blic bahslarining umumiy ro'yxatida ham ikkinchi o'ringa ko'tarilib oldi. Uning hisobida 17 ochko bor. Maksim Vashe-Lagrav 17 ochko bilan kuchi uchlikka yakun yasagan. Alireza Firuzdja 20 ochko bilan umumiy ro'yxatda birinchi o'rinni band etgan. Bugun blic bahslarida 9 tur partiyalari o'ynaladi. Bugungi kunni Nodirbek oq donalarda Gukesh Dommaradjuga qarshi uchrashuv bilan boshlanadi.