Superunited Rapid & Blitz Croatia. Abdusattorovni ishlari chatoq, Gukesh so'nggi 5 ta uchrashuvda g'alaba qozondi

Mukofot jamg'armasi 175 000 AQSH dollarini tashkil etuvchi musobaqa rapid va blic yo'nalishlarida o'tkazilyapti. Unda Magnus Karlsen, Gukesh Dommaradju, Fabiano Karuana singari shaxmat yulduzlari qatorida hamyurtimiz Nodirbek Abdusattorov ham sovrinli o'rinlar uchun dona surmoqda.    

Musobaqa aylanma formatda o'tkazilyapti. Rapid bahslari 9, blic uchashuvlari esa 18 partiyadan iborat bo'ladi. Kecha musobaqaning ikkinchi kuni rapid bahslari doirasida yana 3 ta tur partiyalari o'tkazildi. Nodirbek Abdusattorov 4-turda oq donalarda o'ynaganiga qaramay, amaldagi jahon chempioni Gukesh Dommaradjuga imkoniyatni boy berib qo'ydi. Hindistonlik shaxmatchi hozirgacha o'tkazilgan 6 ta partiyaning 5 tasida g'alaba qozondi. Hatto Magnus Karlsen ham mag'lub etildi. 

Abdusattorov beshinchi turda amerikalik Uesli So bilan durang o'ynadi. Oltinchi turda yana bir AQSH vakili, reytingda o'zidan yuqorida borayotgan Fabiano Karuanaga ham oq donalarda o'ynab, yutqazib qo'ydi. 

Turnirda g'alabaga 2, durangga 1 ochko beriladi. Grossmeysterimiz 12 imkoniyatdan bor yo'g'i 3 ochko to'plab, turnir jadvalida so'nggi 10-o'rinni egallab turibdi. To'qqizinchi pog'onadagi Alireza Firuzdja hisobida 4 ochko bor. Gukesh 10 ochko bilan yakka peshqadam, ikkinchi o'rindagi polshalik Yan-Krishtoff Duda hisobida 8 ochko bor. Uesli So 7 ochko bilan kuchli uchlikka yakun yasagan.