Tashkent Open. Asosiy to'rga qura tashlandi, Sabina va Niginaning raqibalari malum

Sovrin jamg'armasi 250 000 AQSH dollarini tashkil qiluvchi ushbu musobaqaga Respublika olimpiya zaxiralari tennis maktabi kortlari mezbonlik qilmoqda. Bundan bir necha daqiqa avval asosiy to'r bahslariga qura tashlandi. 

Mamlakatimizning birinchi raketkasi Sabina SHaripova ilk davrada rossiyalik Margarita Gasparyanga qarshi kortga chiqadi. Yana bir hamyurtimiz Nigina Abduraimova esa germaniyalik Mona Bartel sinovidan o'tadi. Nigina asosiy to'rda imtiyozli yo'llanma asosida ishtirok etadi.

Taqqoslash uchun, SHaripova dunyo reytingida 126, Gasparyan esa 354-o'rinni egallab turibdi. Abduraimova roppa-rosa 300-pog'onadan joy olgan, uning raqibasi esa 92-o'rinni band etgan. Turnirning birinchi raketkasi ruminiyalik Irina-Kameliya Begu ilk davrada ukrainalik Katerina Kozlova, ikkinchi raketka belaruslik Vera Lapko serbiyalik Boyana Yovanovskiga qarshi kortga chiqadi. 

Afsuski, bugun o'tkazilgan saralash bahslarida ikki tennischimiz mag'lubiyatga uchradi. WTA reytingida 628-o'rinni egallab turgan Oqgul Omonmurodova 184-pog'onadan joy olgan gollandiyalik Bibiana Sxofsga 5:7, 3:6, dunyo reytingida 1236-pog'onadan joy olgan Yasmina Karimjonova esa jahonning 133-raketkasi rossiyalik Anastasiya Potapovaga 3:6, 1:6 hisobida yutqazdi.