Tashkent Open. Bugun Saidakbar chempionlik uchun dona suradi

Respublika ixtisoslashtirilgan bolalar-o'smirlar shaxmat maktabi mezbonlik qilayotgan musobaqada yurtimiz shaxmatchilaridan tashqari Rossiya, Braziliya, Belarus, Ozarbayjon, AQSH, Eron, Armaniston, Markaziy Osiyo mamlakatlaridan kelgan sportchilar bosh mukofot uchun dona surishyapti. 

Toshkent Open turniri shveycarcha tizimda 9 turdan iborat bo'lib, bugun g'olib va sovrindorlar nomi malum bo'ladi. Bugun o'tkaziladigan so'nggi to'qqizinchi turda yosh shaxmatchimiz Saidakbar Saydaliev (2390) birinchi taxtada chempionlik uchun dona suradi. Hamyurtimiz oq donalarda o'zi singari 6,5 ochko jamg'arib turgan belaruslik grossmeyster Aleksey Fyodorov (2552)ga qarshi harakat qiladi. 

Aynan mana shu bahs katta ehtimol bilan Toshkent Open turniri g'olibini aniqlab beradi. Sovrinli o'rinlar uchun yana bir davogar hamyurtimiz SHamsiddin Vohidov bugun qora donalarda Valeriy Kazakovskiyga qarshi bahs olib boradi. Bu ikki shaxmatchi hisobida 6tadan ochko bor. 

Bugun o'tkaziladigan so'nggi 9-tur oldidan musobaqa jadvalida Aleksey Fyodorov va Saidakbar Saydaliev 6,5tadan ochko jamg'arib, qo'shhokimlik qilishyapti. 

Malumot uchun, ananaviy tarzda o'tkazib kelinayotgan xalqaro turnirning mukofot jamg'armasi 20 000 AQSH dollarini tashkil qiladi. Asosiy guruhda birinchi o'rinni egallagan shaxmatchi 3 000 dollarga ega bo'ladi.