Tashkent Open. Nodirbek va SHamsiddin hamon peshqadamlar safida!

Respublika ixtisoslashtirilgan bolalar-o'smirlar shaxmat maktabi mezbonlik qilayotgan musobaqada yurtimiz shaxmatchilaridan tashqari Rossiya, Braziliya, Belarus, Ozarbayjon, AQSH, Eron, Markaziy Osiyo mamlakatlaridan kelgan sportchilar bosh mukofot uchun dona surishyapti. 

Toshkent Open turniri shveycarcha tizimda 9 turdan iborat bo'lib, kecha to'rtinchi tur uchrashuvlari o'tkazildi. Xalqaro master Nodirbek Yoqubboev (2569) Valeriy Kazakovskiy bilan durang o'ynadi. Yana bir istedodli shaxmatchimiz SHamsiddin Vohidov esa qora donalarda harakat qilishiga qaramay, Vaxe Danilyandan ustun keldi. 

Bugun o'tkazilayotgan 5-tur oldidan musobaqa jadvalida eronlik xalqaro grossmeyster Amirrizo Pourramezanali, braziliyalik grossmeyster Aleksandr Fier hamda SHamsiddin Vohidov 3,5tadan ochko jamg'arib, qo'shhokimlik qilishyapti. SHamsiddin qo'shimcha ko'rsatkichlarga ko'ra 3-o'rinni band etgan. Uch ochkoga ega Nodirbek Yoqubboev esa 4-pog'onadan joy olgan. 

O'zbekistonlik shaxmatchilardan Xayrulla To'raev, Sarvinoz Qurbonboeva, Abdumalik Abdusalimov va Ulug'bek Tillaev hisobida ham 3 ochko bor. Bugun ikki yosh shaxmatchimiz xalqaro grossmeysterlarga qarshi dona surishadi. SHamsiddin Amirrizo Pourramezanali, Nodirbek esa Aleksandr Fier bilan hisob-kitob qiladi. 

Malumot uchun, ananaviy tarzda o'tkazib kelinayotgan xalqaro turnirning mukofot jamg'armasi 20 000 AQSH dollarini tashkil qiladi. Asosiy guruhda birinchi o'rinni egallagan shaxmatchi 3 000 dollarga ega bo'ladi.