Tashkent Open. Nodirbek va SHamsiddin peshqadamlar safida!

Respublika ixtisoslashtirilgan bolalar-o'smirlar shaxmat maktabi mezbonlik qilayotgan musobaqada yurtimiz shaxmatchilaridan tashqari Rossiya, Braziliya, Belarus, Ozarbayjon, AQSH, Eron, Markaziy Osiyo mamlakatlaridan kelgan sportchilar bosh mukofot uchun dona surishyapti. 

Toshkent Open turniri shveycarcha tizimda 9 turdan iborat bo'lib, kecha ikkita tur uchrashuvlari o'tkazildi. Xalqaro master Nodirbek Yoqubboev (2569) oq donalarda terma jamoa murabbiyi Akmal Fayzullaevni mag'lubiyatga uchratdi. Uchinchi turda qora donalarda harakat qilib, rossiyalik xalqaro grossmeyster Sergey Ivanov bilan murosaga keldi. 

Yana bir istedodli shaxmatchimiz SHamsiddin Vohidov ham mag'lubiyatsiz odimlayapti. U 3ta uchrashuvda ikki g'alaba va bir durang qayd etdi. U uchinchi partiyada belaruslik xalqaro grossmeyster Aleksey Fyodorov bilan murosaga keldi. Ikkinchi turda Sarvinoz Qurbonboevani taslim etgan edi. 

Bugun o'tkazilayotgan 4-tur oldidan musobaqa jadvalida eronlik xalqaro grossmeyster Amirrizo Pourramezanali va braziliyalik Aleksandr Fier 3tadan ochko jamg'arib peshqadamlik qilishyapti. Nodirbek Yoqubboev 2,5 ochko bilan qo'shimcha ko'rsatkichlarga ko'ra 3-o'rinni band etgan. SHuncha ochkoga ega SHamsiddin Vohidov 7-pog'onadan joy olgan. 

Malumot uchun, ananaviy tarzda o'tkazib kelinayotgan xalqaro turnirning mukofot jamg'armasi 20 000 AQSH dollarini tashkil qiladi. Asosiy guruhda birinchi o'rinni egallagan shaxmatchi 3 000 dollarga ega bo'ladi.